විදුලිබල හා බලශක්ති රාජ්‍ය අමාත්‍ය ඉන්දික අනුරුද්ධ මහතාගේ ආරාධනය පරිදි දිවුලපිටිය නගරය ආශ්‍රිතව නිරීක්ෂණයට එක් වූ අමාත්‍යවරයා එහි පවතින රථ වාහන තදබදය අවම වන ආකාරයට මංසන්ධිය ආශ්‍රිත ප්‍රදේශය වැඩිදියුණු කිරීම සඳහාත් දැනට තාවකාලික ඉදිකිරීම් ඇතුළු විවිධ හේතුන් මත අවහිරව පවතින පදික වේදිකාව ක්‍රමවත්ව ස්ථාපිත කිරීමටත් නගරයේ අවිධිමත් ලෙස සිදු කෙරෙන රථවාහන නතර කිරීම සඳහාත් විධිමත් වැඩපිළිවෙළක් සකස් කිරීමටත් මාර්ග සංවර්ධන අධිකාරියේ නිලධාරීන් වෙත උපදෙස් ලබා දුන්නේය.
මෙම වැඩපිළිවෙළ සඳහා ප්‍රදේශයේ පොලිස් ස්ථානය, නගරයේ වෙ‍ෙළඳ ප්‍රජාව ඇතුළු සියලු දෙනාගේ ද අදහස් හා යෝජනා ලබා ගනිමින් කඩිනමින් මෙම ව්‍යාපෘතිය ක්‍රියාවට නංවා නගරයේ පවතින රථවාහන තදබදය අවම කිරීමට කටයුතු කරන බව අමාත්‍යවරයා අවධාරණය කළේය.
මාර්ග සංවර්ධන අධිකාරියේ අධ්‍යක්ෂ ජනරාල් ශ්‍රද්ධා වීරකෝන් මහතා, බස්නාහිර පළාත් අධ්‍යක්ෂ දර්ශන රුවන් මහතා, දිවුලපිටිය පොලිස් ස්ථානාධිපතිතුමා ඇතුළු නිලධාරීන්, ප්‍රදේශයේ ව්‍යාපාරික ප්‍රජාව ඇතුළු පිරිසක් මෙම නිරීක්ෂණය සඳහා එක්ව සිටියහ.
