රාජ්‍ය ව්‍යවසායන් අතරින් වැඩිම මහජන පෙත්සම් සංඛ්‍යාවක් මෙම ආයතනයේ ක්‍රියාකලාපයට එරෙහිව ලැබී ඇති බවත් කෝප් සභාපතිවරයා සදහන් කළේය.
කැණීම් කරන ලද ඉඩම් නිසි පරිදි ප්‍රතිසංස්කරණය නොකිරීම විගණකාධිපතිවරයාගේ වාර්තාවට අනුව කැණීම් කරන ලද ඉඩම් ප්‍රතිසංස්කරණය කිරීමට ප්‍රමාණවත් ක්‍රියාමාර්ග ගෙන නොතිබීම කෝප් සභාපතිවරයාගේ දැඩි දෝෂදර්ෂණයට ලක්විය. මුදල් ප්‍රතිපාදන ප්‍රමාණවත් නොවීම හේතුවෙන් කැණීම් කරන ලද ඉඩම් ප්‍රතිසංස්කරණය සිදු කිරීමට නොහැකි වී ඇති බව නිලධාරීහු පැවසුහ. කැණීම් කරන ලද ඉඩම් ප්‍රතිසංස්කරණය කිරීම සදහා අයකරන ගාස්තු ප්‍රතිශතය ප්‍රමාණවත් ද යන්න සමාලෝචනය කිරීමට මෙහිදී උපදෙස් දෙන ලදී.
බලපත්ර නිකුත් කිරීම සම්බන්ධ ගැටලු කාර්යාංශය විසින් බලපත්ර නිකුත් කිරීමේ අනුගමනය කරන ක්‍රියා පටිපාටිය පනතට අනුකූල නොවන බවත් අත්තනෝමතික බවත් මෙහිදී සාකච්ඡා විය. නිකුත් කරන ලද බලපත්ර නිසි ක්‍රමවේදයකින් තොරව අත්තනෝමතික ලෙස අවලංගු කර ඇති බවත් මෙහිදී අක්‍රමිකතා සිදුව ඇති බවට නිරීක්ෂණය වන බවත් අනාවරණය විය. බලපත්ර නිකුත් කිරීමට කාර්යාංශයට බලතල ලබාදී ඇතත් තවමත් බලපත්ර නිකුත් කිරීම සඳහා පරිසර අමාත්‍යවරයා වෙත අයදුම්පත් යොමු කරමින් පවතින බවත් අනාවරණය විය. මෙමගින් බලපත්ර නිකුත් කිරීමේ ක්‍රියාවලියේ ස්වාධීනත්වය අභියෝගයට ලක්වීම පිළිබඳව කමිටු සාමාජිකයෝ දැඩි කනස්සල්ල පළ කළහ. කෝප් සභාපති ස්වාධීන නීති නිලධාරියෙකු පත් කිරීමට නියෝග කරයි
කාර්යාංශය තුළ සිදුවන සියලු අක්‍රමිකතා සොයා බැලීමට ස්වාධීන නීති නිලධාරියකු කොන්ත්‍රාත් පදනම මත බදවා ගැනීමට කෝප් සභාපති මහාචාර්ය රංජිත් බණ්ඩාර මහතා දැඩි නියෝගයක් ලබා දුන්නේය. තවද, ආයතනය තුළ සිදුවන කටයුතු සොයා බැලීමට දැනටමත් කෝප් කමිටුව විසින් පත් කර ඇති අනු කමිටුව ක්‍රියාත්මක කිරීමට ද අවශ්‍ය උපදෙස් ලබා දෙන ලදී.
රාජ්‍ය අමාත්‍යවරුන් වන ජගත් පුෂ්පකුමාර, ජානක වක්කුඹුර, ශාන්ත බණ්ඩාර පාර්ලිමේන්තු මන්ත්‍රීවරුන් වන අනුර ප්‍රියදර්ශන යාපා, මහින්දානන්ද අලුත්ගමගේ, දයාසිරි ජයසේකර, එරාන් වික්‍රමරත්න, නිමල් ලාන්සා, සංජීව එදිරිමාන්න, (මේජර්) සුදර්ශන දෙනිපිටිය, ප්‍රේම්නාත් සී දොලවත්ත, උපුල් මහේන්ද්‍ර රාජපක්ෂ, ගරු මධුර විතානගේ සහ මහාචාර්ය චරිත හේරත් යන මහත්වරු ද මෙම කාරක සභාවට සහභාගී වූහ.
