මාධ්‍ය මර්දනය කිරීමේ පිළිවෙතක් ප්‍රතිපත්තියක් ලෙස අනුගමනය නොකරන බවද මාධ්‍යකරුවන් සුරක්ෂිත කොට ආරක්ෂා කිරීම වැදගත්ය යන තැන සිට රජයක් වශයෙන් කටයුතු කරන බවද ජනමාධ්‍ය අමාත්‍ය කැබිනට් ප්‍රකාශක ආචාර්ය බන්දුල ගුණවර්ධන මහතා පවසයි.
අමාත්‍යවරයා මේ බව පැවසුවේ අද (04) රජයේ ප්‍රවෘත්ති දෙපාර්තමේන්තුවේ පැවති කැබිනට් තීරණ දැනුම්දීමේ මාධ්‍ය හමුවේදී මාධ්‍යවේදියෙකු යොමුකළ පැනයකට ප්‍රතිචාර දක්වමිනි.
ජනමාධ්‍යවේදීන්ගේ ආරක්ෂාව සඳහා ජනමාධ්‍ය හැඳුනුම්පතක් ලබාදී ඇතිබව සිහිපත් කළ ජනමාධ්‍ය අමාත්‍යවරයා එම හැඳුනුම්පතට ආරක්ෂක අංශ විසින් ප්‍රමාණවත් සැලකිල්ලක් දක්වන බවද සඳහන් කළේය.
යම්කිසි ජනමාධ්‍යකරුවෙකුට අසාධාරණ ලෙස පහරදීමක් හෝ වෙනත් තර්ජනයක් සිදුවන්නේ නම් එය දැනුම්දුන හොත් විෂයභාර අමාත්‍යවරයාට ඒ සම්බන්ධයෙන් දැනුවත් කළ හැකි බවද පැවසුවේය.
රජයේ නිල පුවත් වෙබ් අඩවිය පවත්වාගෙන යනු ලබන්නේ රජයේ ප්‍රවෘත්ති දෙපාර්තමේන්තුවේ නව මාධ්‍ය ඒකකය මගිනි. 1996 වර්ෂයේ මැද භාගයේ දී news.lk නමින් ආරම්භ කළ එය අන්තර්ජාලයට මුදාහරින ලද්දේ 1997 මාර්තු මස 01 දින දීය. එතැන් පටන් සිංහල, දෙමළ හා ඉංග්‍රීසි භාෂාවලින් පවත්වාගෙන යනු ලබයි.
+94 11 366 3040
