මෙම ඇසුරුම් පරීක්ෂණ රසායානාගාරය හරහා මෙරට නිෂ්පාදනය කෙරෙන කිරිපිටි, ජල බෝතල් , , විවිධ ආහාර ද්‍රව්‍ය , සිමෙන්ති , කාඩ්බෝඩ් ඇතුළු විවිධ පරාසයේ ඇසුරුම් රැසක ප්‍රමිතිය පිළිබදව පරික්ෂාවට ලක් කළ හැකි අතර අපනයන නිෂ්පාදනයන් සිදුකිරීමේදී මෙම ඇසුරුම්කරන පරීක්ෂාව ඉතා වැදගත් අවස්ථාවක් නිෂ්පාදන කර්මාන්ත කරුවන්ට උදාකර දෙයි.
මෙහිදී අදහස් දක්වමින් කර්මාන්ත හා වැවිලි කර්මාන්ත අමාත්‍යවරයා ප්‍රථමයෙන් , මෙම ඇසුරුම් පරීක්ෂණ රසායානාගාරය මෙරටට ලබාදීමට අවශ්‍ය කටයුතු සම්පාදනය වෙනුවෙන් යුරෝපා සංගමයටත් , එක්සත් ජාතීන්ගේ කර්මාන්ත සංවර්ධන ආයතනයටත් සිය ස්තුතිය පළ කළේය. එමෙන්ම කාර්මික තාක්ෂණ ආයතනය විසින් වර්ථමානයේ සිදු කරන මෙහෙය පිළිබඳවද සිය ප්‍රශංසාව පළ කළ අමාත්‍යවරයා විවිධත්වයෙන් යුතු ඇසුරුම්කරනය මෙන්ම එහි ප්‍රමිතිය ජාත්‍යන්තරයට ගැලපෙන ලෙසින් ආරක්ෂා කරගැනීමේ වැදගත්කමද පෙන්වා දුන්නේය. එමෙන්ම එහිදී අමාත්‍යවරයා මෙලෙස අභිනවයෙන් ස්ථාපිත කළ ඇසුරුම් පරීක්ෂණ රසායානාගාරයේ උපරිම ප්‍රයෝජනය මෙරට නිෂ්පාදන කර්මාන්තයන් අත්කර ගතයුතු බවත් සදහන් කළේය.
මෙම අවස්ථාවේදී අදහස් දැක්වූ යුරෝපා සංගමයේ ශ්‍රී ලංකාව හා මාලදිවයින සදහා තානාපති Denis Chaibi මහතා සදහන් කළේ, ඇසුරුම්කරනයක් යනු අලෙවිකරණ මෙවලමක් පමණක් නොව , එය සමාගමක පාරිසරික, සමාජීය සහ ආයතනික ප්‍රමිතීන් ගැන බොහෝ දේ පවසන ව්‍යාපාරික කාඩ්පතක් බවත් එනිසා ශ්‍රී ලංකාවට අවශ්‍ය විදේශ විනිමය ගෙන ඒමට අපනයනවලට උපකාර වන ඇසුරුම් ප්‍රමිතිගත කිරීමට මෙලෙස පරීක්ෂණ මධ්‍යස්ථානයක් ආරම්භ කිරීමට යුරෝපා සංගමය සහාය දැක්වූ බවත්ය.
එමෙන්ම UNIDO හි ජ්‍යේෂ්ඨ තාක්ෂණික විශේඥ ආචාර්ය Jairo A. Villamil-Diaz මහතා අදහස් දක්වමින් සදහන් කළේ යුරෝපා වෙළෙඳපොළට භාණ්ඩ අපනයනය කිරීමේදී එහි ඇසුරුම් ප්‍රතිචක්‍රීයකරණය කළ හැකි ඒවා වියයුතු බවත් , මෙම පරීක්ෂණ රසායනාගාරයේ පහසුකම් යොදාගෙන යුරෝපා වෙළෙඳපොළට උසස් තත්වයේ ඇසුරුම් සහිතව භාණ්ඩ අපනයනය කිරීමට ශ්‍රී ලාංකිකයන්ට අවස්ථාව ලැබෙන බවයි.
මෙම අවස්ථාවට ශ්‍රී ලංකාව සහ මාලදිවයින සදහා යුරෝපා සංගමයේ නියෝජිත කණ්ඩායම් සහයෝගිතාවයේ අන්තර්වාර ප්‍රධානී Beatrice BUSSI මහත්මිය , කාර්මික තාක්ෂණ ආයතනයේ සභාපති මහාචාර්ය G.A.S ප්‍රේමකුමාර මහතා ඇතුළු ආයතන නිළධාරින් රැසක් එක්වූහ.
