ඒ අනුව දැනට ක්‍රියාත්මක චක්‍රලේඛ විධිවිධාන තවදුරටත් විධිමත් කරමින් අතරමැදි ශ්‍රේණිවලදී සත්‍යවශයෙන්ම පාසල් මාරු කිරීමට අවශ්‍ය කණ්ඩායම් හඳුනාගනිමින් සියලු සිසුන්ට සධාරණ හා සම්ප්‍රවේශ අවස්ථා සැලසෙන පරිදි මෙම නව ක්‍රමවේදය හඳුන්වා දෙන බව අමාත්‍යවරයා පැවසීය.
වැඩිදුරටත් අදහස් දැක් වූ අමාත්‍යවරයා පැවසුවේ,
ජනප්‍රිය යම් සම්මත ඇතැම් පාසල් වල පන්තිකාමරයක දරුවන් සංඛ්‍යාව 50-55 දක්වා වැඩි වී තිබෙනවා. මේ හේතුවෙන් ගුරුවරුන්ට සිසුන්ගේ පොත් පත් පරීක්ෂා කිරීමට හෝ බැරි වෙලා තිබෙනවා. අධ්‍යාපන අමාත්‍යංශයට මේ සම්බන්ධයෙන් නිරන්තරයෙන් ඉල්ලීම් එනවා.
ඒ අනුව දැනට පවතින 1-5 ශ්‍රේණිවල එක් පන්තියක සිටින උපරිම සිසුන් සංඛ්‍යව 40 සහ 6-11 ශ්‍රේණි වල එක් පන්තියක සිටින උපරිම සිසුන් සංඛ්‍යාව 45 වශයෙන් එම ක්‍රමවේදය නොවෙනස්ව පවත්වාගෙන යන බවද බන්දුල ගුණවර්ධන මහතා පැවසීය.
