ඒ අනුව 2017 මැයි මස 17 සිට19 දින දක්වා පැවැත්වෙන මෙම ප්‍රදර්ශනයට ශ්‍රී ලංකාව නියෝජනය කරමින් සිසුන් සිව් දෙනෙක් සහභාගීවීමට නියමිතයි. මේ සඳහා රටවල් 75ක් නියෝජනය කරමින් තරුණ විද්‍යා පුරෝගාමීන් 1700කට අධික පිරිසක් සහභාගී වේ. පසුගිය වසරවල දී ද ශ්‍රී ලංකාවට මෙම ප්‍රදර්ශනය සඳහා සහභාගී වීමට අවස්ථාව ලැබුණු අතර එහි දී ලාංකීය සිසුන් අන්තර්ජාතික මට්ටමින් විශිෂ්ට මට්ටමේ සම්මාන ද හිමිකරගෙන ඇත.
මෙවර මෙම අන්තර්ජාතික ප්‍රදර්ශනය සඳහා නාරම්මල මයුරපාද විද්‍යාලයේ ගංගොඩවිල කංකානම්ලාගේ ගංගොඩවිල, අම්බලන්ගොඩ ධර්මාශෝක විද්‍යාලයේ වළාකුළුගේ සනුජ අබේවික්‍රම, දෙහිවල එස් ද එස් ජයසිංහ විද්‍යාලයේ අලුජ්ජාගේ පෙරේරා, සහ පට්ටියගේ කවිශ්ක යන සිසුන් සිව්දෙනා ඉදිරිපත් වීමට නියමිතයි.
මෙම අන්තර්ජාතික ප්‍රදර්ශනය සඳහා සිසුන් තෝරාගනු ලැබූයේ, අධ්‍යාපන අමාත්‍යාංශයත්, ජාතික විද්‍යා පදනමත්(NSF), ශ්‍රී ලංකා ඉංජිනේරු ආයතනය(IESL), ඉන්ටෙල් ශ්‍රී ලංකා ආයතනයත්(INTEL Sri Lanka) එක්ව සංවිධානය කරන ලද ශ්‍රී ලංකා විද්‍යා හා ඉංජිනේරු ප්‍රදර්ශනය සඳහා තෝරාගත් නව නිර්මාණකරුවන් 20 දෙනා අතරිනුයි. ශ්‍රී ලංකා ඉංජිනේරු ආයතනය විසින් දිවයිනේ සියලු පාසල් අතරින් තෝරාගත් වසරේ කණිෂ්ඨ නිර්මාණකරුවන් 10 දෙනෙකු සහ ජාතික විද්‍යා පදනම විසින් සංවිධානය කරන ලද විද්‍යා හා පර්යේෂණ තරගාවලියෙන් තෝරාගත් විශිෂ්ට නිර්මාණකරුවන් 10 දෙනෙකු මෙම ශ්‍රී ලංකා විද්‍යා හා ඉංජිනේරු ප්‍රදර්ශනයට සහභාගී කරවා ගෙන ඇති අතර මෙම අන්තර්ජාතික ප්‍රදර්ශනයට එක්ව සිටින්නේ ඔවුන් අතරින් තෝරාගත් නව නිර්මාණකරුවන් සිවුදෙනෙකුයි.
මෙම ගුවන් ටිකට් පත් ප්‍රදානය කිරීමේ අවස්ථාවට අධ්‍යාපන ලේකම් සුනිල් හෙට්ටි ආරච්චි මහතා, ජාතික විද්‍යා පදනමේ සහ ශ්‍රී ලංකා ඉංජිනේරු ආයතනයේ නියෝජිතවරුන් ඇතුළු පිරිසක් එක්ව සිටියහ.
