අධ්‍යාපන අමාත්‍ය අකිල විරාජ් කාරියවසම් මහතාගේ උපදෙස් මත පන්ති කාමර වලට ඇතුළත්කර ගන්නා සිසුන් ප්‍රමාණය අඩුකිරීමට අමාත්‍යංශය ප්‍රතිපත්තිමය තීරණයකට එලඹ ඇති අතර 2013 වසරේදී ශ්‍රේෂ්ඨාධිකරණය මගින් ලබාදී ඇති තීන්දුවකට අනුව පන්ති කාමර වල සිටිය යුතු උපරිම සිසුන් ප්‍රමාණය 35 සිමාවේ රඳවා ගැනීමටද නියෝග කර ඇත.
ඒ අනුව 2016 දී සිසුන් 40ක් පමණක් බඳවාගෙන වසරකදී එක් සිසුවෙකු බැගින් අඩුකරමින් 2021 වසරේදී එක් පන්ති කාමරයක සිටිය යුතු උපරිම සිසුන් ප්‍රමාණය 35 මට්ටමට ගෙන ඒමට කටයුතු කරමින් පවතී.
එහිදී එක් පන්තියකට උපරිමය ළමුන් 5 බැගින් ඇතුළත් කිරීම සඳහා ත්‍රිවිධ හමුදාවට සහ පොලීසියේ සාමාජිකයන්ට කෝටා ක්‍රමය මගින් අවකාශ හිමිවන අතර එම කොටා ක්‍රමයට අනුව සිසුන් තෝරාගැනීමේදී ප්‍රමුඛතාවය ක්‍රියාන්විත රාජකාරියේ යෙදී සිටියදී අබාධිත සහ ශාරීරික දුබලතාවයන්ට පත්වූ ත්‍රිවිධ හමුදා සහ පොලීසියේ රණවිරුවන්ගේ දරුවන්ට ලබාදෙන ලෙස අධ්‍යාපන අමාත්‍යවරයා 2018 වසර සඳහා පළමු වසර සිසුන් ඇතුළත් කිරීමේ චක්‍රලේඛය සකස්කිරීමට පත්කර ඇති කමිටුවට නියෝග කර තිබේ.
