ජපන් රජය සිදු කරන ලද ආරාධනයකට අනුව, ජනාධිපති අනුර කුමාර දිසානායක මහතා සැප්තැම්බර් 27 වැනි දින සිට 30 වැනි දා දක්වා ජපානයේ නිල සංචාරයක නිරත වනු ඇත.
මෙම සංචාරය අතරතුරදී, ජනාධිපතිවරයා ජපන් අධිරාජ්යයා හමුවීමට නියමිත වේ. එසේම ජනාධිපතිවරයා ජපන් අග්රාමාත්යවරයා සමඟ අන්යෝන්ය වශයෙන් වැදගත් කරුණු ගණනාවක් පිළිබඳව අවධානය යොමු කෙරෙන සමුළු රැස්වීමක් ද පවත්වනු ඇත.
ශ්රී ලංකාවේ වර්ධනය වන ආර්ථික අවස්ථා කෙරෙහි අවධානය යොමු කරමින්, ටෝකියෝවේ ප්රමුඛතම ජපන් ව්යාපාර සහ ආයෝජකයින්ගේ ඉහළ පෙළේ නියෝජිතයින්ගේ සහභාගිත්වයෙන් පැවැත්වෙන ව්යාපාරික සංසදයක්ද ජනාධිපතිවරයා අමතනු ඇත.
2025 එක්ස්පෝ ප්රදර්ශනයේ ශ්රී ලංකා දිනයේදී, ජපන් රජයේ ආරාධිතයෙකු ලෙස, “එක්ස්පෝ 2025 ඔසාකා” (EXPO 2025 Osaka) ප්රදර්ශනය සඳහාද ජනාධිපතිවරයා සහභාගී වනු ඇත. මෙම ප්රදර්ශනයේ අරමුණ වන්නේ ජාත්යන්තර ප්රජාව හමුවේ ශ්රී ලංකාවේ සංස්කෘතික උරුමය සහ ආර්ථික හැකියාවන් විදහා දැක්වීම වේ.
එසේම ජනාධිපතිවරයා, ජපානයේ වෙසෙන විදේශගත ශ්රී ලාංකික ප්රජාවේ සාමාජිකයින්ද අමතනු ඇත.
ජනාධිපතිවරයා සමඟ විදේශ කටයුතු, විදේශ රැකියා සහ සංචාරක අමාත්ය විජිත හේරත් මහතා සහ රජයේ ජ්යෙෂ්ඨ නිලධාරීන් පිරිසක් මෙම සංචාරයට සහභාගී වේ.
ජනාධිපතිවරයාගේ මෙම ජපන් සංචාරය ඔස්සේ දෙරට අතර ඇති දිගුකාලීන මිත්රත්වයේ සහ සහයෝගීතාවයේ බැඳීම් තවදුරටත් තහවුරු කරනු ඇත.
