මේ ශූරතාවලිය ක්‍රීඩා ඇමැති දයාසිරි ජයසේකර මහතාගේ ප්‍රධානත්වයෙන් පැවැත්වෙන අතර දෙදින ශූරතාවලියේ එක් ප්‍රධාන අංගයක් වන ‘සැමට පාපැදිය’ යන තේමාව යටතේ පැවැත්වෙන පාපැදි රැලිය සඳහා ද අමාත්‍යවරයා සහභාගී වීමට නියමිතය. එසේම ජය සංකේත ප්‍රදානය 31 වැනිදා පස්වරු 5.00 ට ක්‍රීඩා අමාත්‍යවරයාගේ ප්‍රධානත්වයෙන් සිදු කෙරෙනු ඇත.

ශ්‍රී ලංකා පාපැදි සම්මේලනයේ මෙහෙයවීමෙන් පැවැත්වෙන ජාතික පාපැදි ශූරතාවලියේ ‘කේවල කාලය මැනීමේ තරග‘ හෙට දිනයේ ත්, ‘මාර්ග තරග‘ සෙනසුරාදා (31) දිනත් පැවැත්වීමට කටයුතු සැලසුම් කර ඇත.

කේවල කාලය මැනීමේ තරග අනුරාධපුර ගුවන් හමුදා කඳවුර අභියසින් ආරම්භ වී කවරක්කුලම හන්දිය දක්වා හා නැවත එම මාර්ගයේ ආපසු ගුවන් හමුදා කඳවුර දක්වා පැමිණ එක් තරග වටයක් අවසන් කරයි. මේ වටයක දුර කිලෝ මීටර 13.4කි.

මාර්ග තරග අනුරාධපුර හරිස්චන්ද්‍ර උද්‍යානය අභියසින් ආරම්භ වී සිංහ කණුව අසලින් වමට හැරී ශ්‍රී මහා බෝධි මාර්ගයෙන් දකුණට හැරී පැරණි පුරහල හන්දියෙන් වමට හැරී භික්ෂු විශ්වවිද්‍යාලය, රුවන්වැලි සෑය, අභය වැව අසලින් වමට හැරී කෞතුකාගාරය, පොකුණු තුන, මිරිසවැටිය, තිසා වැව, පණ්ඩුලගමෙන් වමට හැරී පුත්තලම මාර්ගය ඔස්සේ 2 කණුව, වෙස්සගිරිය, ඉසුරුමුණියෙන් දකුණට හැරී ජයන්ති විහාරය අසලින් වමට හැරී ජයන්ති මාවත ඔස්සේ නැවත හරිස්චන්ද්‍ර උද්‍යානය ඉදිරිපිටට පැමිණ එක් තරග වටයක් අවසන් කරයි. වටයේ දුර කිලෝ මීටර 14.55කි.

දිස්ත්‍රික් පාපැදි සංගම් විසින් තරග පවත්වා තෝරා ගත් පාපැදි ක්‍රීඩක ක්‍රීඩිකාවන් මේ ජාතික ශූරතාවලියට සහභාගි වන අතර ලබන වසරේ ඉන්දියාවේ පැවැත්වීමට නියමිත දකුණු ආසියානු ක්‍රීඩා උළෙලට ශ්‍රී ලංකා පාපැදි කණ්ඩායම තෝරා ගැනීමේ ඉසව්වක් ලෙසින්ද මේ ශූරතාවලිය සැලකේ.