2013 වර්ෂයේ කිරිපිටි ටොන් 84,000ක් මෙරටට ආනයනය කළත් 2014 වර්ෂයේ මේ දක්වා ආනයනය කළ කිරිපිටි ප්‍රමාණය ටොන් 6,000ක් පමණි. කෙසේ වෙතත් සෞඛ්‍ය අමාත්‍යාංශයේ නියමය පරිදි මෙරටට ගෙන්වන සෑම කිරිපිටි තොගයක ම DCD පරීක්ෂාව ITI ආයතනය සිදු කරන බව ද අමාත්‍යවරයා පෙන්වා දුන්නේය.
ඒ සෑම පරීක්ෂණයක් ම නිවැරදි රසායනාගාර ක්‍රමවේද අනුගමනය කරමින් ජාත්‍යන්තරය පිළිගත් රසායනාගාර තත්ත්ව යටතේ සිදුකර ඇත. මේ දක්වා සිදුකළ සියලුම DCD පරීක්ෂාවල වාර්තා නිවැරදි බවට ITI ආයතනය මෙන්ම තමන් ද තහවුරු කරන බව අමාත්‍ය චම්පික රණවක මහතා පැවසීය.
DCD පරීක්ෂාව සම්බන්ධයෙන් 2013 වසරේ පැවති හැකියාව මේ වන විට වැඩිකර ගැනීමට ITI ආයතනය සමත් වී ඇත. කිරිපිටි හෝ අයිසික්‍රීම් හෝ වෙනත් ඕනෑම ආහාරයක විෂකාරක ශරීරයට අහිතකර රසායනික සංයෝග අඩංගු වේ නම් එය රටේ මිලියන 20ක ජනතාවගේ ආහාර ක්‍රමවේද සහ ජීවිත පිළිබඳ ප්‍රශ්නයක් බව අමාත්‍යවරයා ප්‍රකාශ කළේය. එහෙයින් ආහාර නිෂ්පාදන පිළිබඳ 100%ක් නොදන්නා කරුණු ඉස්මතු කරමින් වෙළෙඳ දැන්වීම් ප්‍රචාරය සුදුසු නොවන බවත් තම අමාත්‍යාංශය හෝ ඒ යටතේ ඇති ආයතන සල්ලිවලට යට නොවන බවත් අමාත්‍යවරයා වැඩිදුරටත් සඳහන් කර සිටියේය.
මිනිස් ජන ජීවිතයට ඍජුව ම සම්බන්ධ කාරණා වාර්තා කිරීමේදී ඒ පිළිබඳ ව වන තාක්ෂණික කරුණු පිළිබඳව ද නිවැරදි වාර්තාකරණය අත්‍යවශ්‍යය. ඒ සඳහා තම අමාත්‍යාංශයට සහ අනුබද්ධ ආයතනවලට දායකත්වය ලබාදෙන මෙන් ඇමති චම්පික රණවක සියලු ජනමාධ්‍යවේදීන්ගෙන් ඉල්ලීමක් ද කළේය. ඒ තත්ත්වයන් සපුරාගැනීමට තමන් සහ තම ආයතන නිලධාරීන් ඕනෑම අවස්ථාවක ඉදිරිපත්වන බව ද අමාත්‍යවරයා තවදුරටත් සඳහන් කළේය.
NDH
