පළාත් ආණ්ඩුකාරවරිය මේ බව සඳහන් කළේ පසුගියදින ඇඹිලිපිටියේ දී පැවති ඇඹිලිපිටිය අධ්‍යාපන කලාපයේ විදුහල්පතිවරුන්ගේ රැස්වීමට එක් වෙමිනි.
සබරගමුව පළාතේ සිංහල හා දෙමළ මාධ්‍ය ගුරු හිඟයට පිළියම් ලෙස නවක උපාධිධාරී සහ ඩිප්ලෝමාධාරී ගුරුභවතුන් 900ක් බඳවා ගැනීමට පළාත් සභාව කටයුතු කර ඇති බවත් ඊට අදාල ඉල්ලුම්පත් මේ වන විටත් කැඳවා ඇති බවත් ආණ්ඩුකාරවරිය පැවසීය.
දේශපාලනය හෝ වෙනත් කිසිඳු බලපෑමකින් තොරව, පූර්ණ විනිවිද භාවයකින් යුත් ක්‍රියා පටිපාටියක් යටතේ මෙම ගුරුභවතුන් බඳවා ගන්නා බවත් සබරගමුව පළාත තුළ සුදුසුකම් ලත් දමිළ මාධ්‍ය ගුරුභවතුන් නොමැති හේතුවෙන් විශ්‍රාම ලැබූ දමිල මාධ්‍ය ගුරුභවතුන් ද යළි සේවයට කැඳවන බවත් පළාත් ආණ්ඩුකාරවරිය මෙහිදී වැඩිදුරටත් පැවසීය.
මෙම අවස්ථාවට පළාත් අධ්‍යාපන ලේකම් මහින්ද එස්. වීරසූරිය, පළාත් ආණ්ඩුකාර සහකාර ලේකම් ශමේධානී මාතරහේවගේ, පළාත් අධ්‍යාපන අධ්‍යක්ෂ සේපාල කුරුප්පුආරච්චි සහ කලාප අධ්‍යාපන අධ්‍යක්ෂ ඩබ්. එන්. කේ. ධනවර්ධන යන මහත්ම මහත්මින් එක්ව සිටියහ.
