මෙම ගම්මානය හම්බන්තොට දිස්ත්‍රික්කයේ හම්බන්තොට නයිට් බසාර් ප්‍රදේශය ආශ්‍රිතව පවතින අතර මෙම ගම්මානය වෙත පිවිසීමේ මාර්ග සමඟ අනෙකුත් මාර්ග, ජල පහසුකම් හා විදුලිය වැනි මූලික අවශ්‍යතා සම්පූර්ණ කර තිබේ.
මෙම වැඩසටහනට සමගාමීව ප්‍රදේශයේ නිවාස 200ක් වැඩිදියුණු කර ගැනීම සඳහා 'විසිර ණය' ප්‍රදානය හා මෙතෙක් රජයේ ඉඩම්වල පදිංචි වී සිටි ප්‍රදේශයේ පවුල් 300ක් සඳහා ඔප්පු හා ඉඩම් බලපත්‍ර පිරිනැමීම, ජාතික හැඳුනුම්පත් නිකුත් කිරීමේ ජංගම සේවාවක්, ඉඩම් ජංගම සේවාවක්, වෛද්‍ය සායනයක්, ඉදිකිරීම් ශිල්පීය පුහුණුව සහ ආධුනිකයින් 50 දෙනෙකු බඳවා ගැනීමේ වැඩසටහනක් හා ගෙවතු වගා උපකරණ කට්ටල බෙදාදීමේ වැඩසටහන්ද ක්‍රියාත්මක කෙරේ.
ප්‍රජා සහභාගිත්වය වැඩපිළිවෙළක් ලෙස පසුගිය ඔක්තෝම්බර් මාසයේ නැවත සක්‍රිය කළ උදා ගම්මාන වැඩපිළිවෙළ යටතේ දිවයින පුරා ආදර්ශ ගම්මාන 38ක් ඉදිකිරීම ආරම්භ කෙරිණි.
මෙම වසර තුළ රාජ්‍ය අනුග්‍රහය යටතේ නව උදා ගම්මාන 200ක් ද ඊට සමගාමීව පෞද්ගලික ධන පරිත්‍යාගශීලීන්ගේ අනුග්‍රහය යටතේ තවත් උදා ගම්මාන 200ක් ද ජනතා අයිතියට පත් කිරීමට නියමිතය.
