ජනාධිපති ලේකම් කාර්යාලයේ දී ඊයේ (09) පස්වරුවේ පැවති රාජ්‍ය හා නියෝජ්‍ය අමාත්‍යවරුන් දිවුරුම් දීමේ අවස්ථාවේදී සිරිසේන මැතිතුමා මෙම අදහස් ප‍්‍රකාශ කළේය.
තමන් කිසිම අවස්ථාවකදී විදේශ බලෙවේග හා බලපෑම්වලට යටත් නොවන අතර ශ‍්‍රී ලංකාවේ කීර්තිනාමයට හානී නොකරන බවද සඳහන් කළ ජනාධිපතිතුමා සෑම ආගමික දර්ශනයකින් ම ගම්‍ය වන්නේ මිනිසුන්ගේ යහපත උදෙසා මිනිසුන් එකතු වීම බවද සඳහන් කළේය.
සියලු දෙනාම පටු දේශපාලන පරමාර්ථවලින් බැහැරව හෘද සාක්ෂියට එකඟව නිතර ම රට සහ ජනතාව පිළිබඳ අවදියෙන් සිටිය යුතු බව ද ජනාධිපතිතුමා ප‍්‍රකාශ කළේය.
තමා හදුන්වා දුන් ජාතික ආණ්ඩු සංකල්පය තුළින් ඉදිරි පස් වසර තුළ ශක්තිමත් ආණ්ඩුවක් මෙහෙයවන බවත් එය දුර්වල කිරීමට හෝ අස්ථාවර කිරීමට කිසිවෙකුටවත් ඉඩ නොදෙන බවද ජනාධිපතිතුමා පැවසීය.
තමන්ගේ බුද්ධිය, දැනුම, අත්දැකීම් අනුව රට ගොඩනැගීමට කැපවිය යුතු අතර රාජ්‍ය දේපළ වත්කම් පිළිබඳ ව කිසිම ආකාරයකින් දුෂණ හොරකම් චෝදනා සම්බන්ධව වගඋත්තරකරුවන් නොවීමට වගබලාගත යුතු බව පැවසූ ජනාධිපතිතුමා තම තමන්ගේ වගකීම නිසි අයුරින් ඉටු කරනු ඇතැයි තම විශ්වාසය බවද සඳහන් කළේය.
