කොළඹ රාජකීය විද්‍යාලයීය නව රඟහලේ පැවති ස්ටීම් අධ්‍යාපන වැඩසටහනේ සමාරම්භක අවස්ථාවට සහභාගී වෙමින් මේ බව පැවසූ අමාත්‍යවරයා, ඇමරිකාව ප්‍රමුඛ ලොව පුරා රටවල් 96ක පමණ භාවිත වන ඉතා සාර්ථක අධ්‍යාපන ක්‍රමවේදයක් වශයෙන් ස්ටීම් අධ්‍යාපනය හඳුන්වා දෙමින් විද්‍යාව, තාක්ෂණය, ඉංජිනේරු විද්‍යාව හා ගණිතය යන විෂය හතර මූලික කරගෙන ස්ටෙම් නමින් (STEM- Science, Technology, Engineering, Mathematics) ඇමරිකා එක්සත් ජනපදයේ ජාතික විද්‍යා පදනම විසින් 1999 වසරේ දී එරටට හඳුන්වා දුන් මෙම නව අධ්‍යාපන ක්‍රමවේදය අද වන විට සංවර්ධනය වී කලා විෂයන් ද ඇතුළත් ව ස්ටීම් අධ්‍යාපනය නමින් (STEAM- Science, Technology, Engineering, Arts, Mathematics) ලොව පුරා ප්‍රචලිත ව ඇති බවත් පැවසී ය.
වත්මන් පරිවර්තනීය අධ්‍යාපන ක්‍රියාදාමය ඔස්සේ අභිනවයෙන් මෙරටට හඳුන්වා දෙන මෙම ස්ටීම් අධ්‍යාපන ක්‍රියාවලිය තුළ විෂය ධාරාව අනුව කිසි දු දරුවකු පාසල් අධ්‍යාපනයෙන් අතරමග දී ඉවත් නොකෙරෙන බවත් අද අනවරත තරගයකට මැදි ව සිටින සිසුන්ට විමර්ශනශීලී ව සතුටින් අධ්‍යාපනය ලැබිය හැකි සුහුරු පාසල් පරිසරයක් නිර්මාණය වන බවත් ඒ තුළ දරුවන්ට කණ්ඩායම් හැඟීමෙන් යුතු ව සහයෝගයෙන් නිදහසේ ඉගෙනගත හැකි බවත් අමාත්‍යවරයා වැඩි දුරටත් සඳහන් කළේ ය.
එසේ ම සිංගප්පූරුව වැනි රටවල විද්‍යා මධ්‍යස්ථාන, කෞතුකාගාර වැනි ස්ථාන පිරී පවතින්නේ ප්‍රාථමික හා පෙරපාසල් වියේ දරුවන්ගෙන් බවත් පූර්ව ළමා වියේ දී ම ඒවා නිරීක්ෂණයට ලැබෙන අවස්ථා සමග ජනිත වන කුතුහලය ඔස්සේ සිසුන් තාර්කික චින්තනයට නැඹුරු වන බවත් පැවසූ අමාත්‍යවරයා නුදුරු අනාගතයේ ම මෙරටටත් විද්‍යා මධ්‍යස්ථානයක් ලබා දීමට පියවර ගන්නා බව ද මෙහි දී සඳහන් කළේ ය. කෘත්‍රීම බුද්ධිය, රොබෝ තාක්ෂණය, ජෛව හා නැනෝ තාක්ෂණය, ජාන තාක්ෂණය වැනි ලොව නැගී එන විෂයන් අපේ විශ්වවිද්‍යාල පද්ධතියට මෙන් ම පාසල් අධ්‍යාපනයටත් ඇතුළත් විය යුතු අතර කෘත්‍රීම බුද්ධිය නිසා ඉදිරියේ දී රැකියා අහිමි වන මිලියන 300ක ජනතාව වෘත්තීය ක්‍රියාදාමයට අනුගත කරගැනීමේ මං සොයන ලෝකය සමග අප ද එක් විය යුතු බවත් නව අධ්‍යාපන පරිවර්තන හරහා මෙරට දරුවන්ට එයට මග සැලසෙනු ඇති බවත් හෙතෙම සඳහන් කළේ ය. දැනුම අතින් ඉහළ ස්ථානයක සිටින මෙරට ශිෂ්‍ය ප්‍රජාවට සිය කුසලතා ඔප් නංවා ගැනීම මගින් ඊට අනුගත වීම එතරම් දුෂ්කර නොවනු ඇතැයි ද අමාත්‍යවරයා පැවසී ය.
ඉදිරියේ දී දීපව්‍යාප්ත ව ක්‍රියාවට නැංවෙන මෙම නව අධ්‍යාපන ක්‍රමවේද ඔස්සේ දෙස් විදෙස් සේවයේ නියුතු ශ්‍රී ලාංකික විද්‍යාඥයන් ඇතුළු විශ්වවිද්‍යාල ආචාර්ය මහාචාර්යවරුන් හා වෙනත් විද්වතුන් සමග බුද්ධිමය සංවාද හා සාකච්ඡාවල යෙදෙමින් ප්‍රායෝගික ව විෂය සිද්ධාන්තමය දැනුම උකහා ගැනීමේ අවස්ථාව මෙරට පාසල් සිසුන්ට උදා වනු ඇතැයි ද පැවසූ අමාත්‍යවරයා මේ අවස්ථාවට සහභාගී වූ අධ්‍යාපන‍ඥයන්, විද්වතුන් හා නිලධාරීන් මෙන් ම ප්‍රතිලාභී ශිෂ්‍ය ප්‍රජාව ද ඇගයීමට ලක් කළේ ය.
