"කොවිඩ්-19 වසංගතයෙන් පසු ව නවෝත්පාදන, වැඩ ලෝකය සහ තිරසාර සංවර්ධනය උදෙසා අධ්‍යාපන සංවර්ධනය" යන තේමාව මුල් කරගනිමින් පැවති මෙවර සමුළුවේ දී එහි සමාරම්භක උළෙල අමතා දකුණු ආසියාව නියෝජනය කරමින්, COVID-19 වසංගතයෙන් පසු ශ්‍රී ලංකාවේ අධ්‍යාපන තත්වය, අභියෝග, උගත් පාඩම් සහ ඉදිරි ක්‍රියාමාර්ග සම්බන්ධ ව මෙරට අධ්‍යාපන අමාත්‍යවරයා විසින් විශේෂ ඉදිරිපත් කිරීමක් සිදු කරන ලදි.
මෙහි දී ආර්ථික වර්ධනය සඳහා අධ්‍යාපනය, COVID-19 වසංගතයෙන් පසු වඩාත් ශක්තිමත් ව නැවත ගොඩනැගීම සහ මූල්‍ය අර්බුද, දේශගුණික විපර්යාස, වසංගත වැනි අනපේක්ෂිත ව්‍යසනකාරී සහ අර්බුදකාරී තත්ව හමුවේ වුව ද, සම-සාධාරණ අධ්‍යාපන අවස්ථා තවදුරටත් පුළුල් කරමින් හා ඔරොත්තු දීමේ හැකියාව සහිත ව අධ්‍යාපන පද්ධතිය ගොඩනැංවීමේ කාලීන අවශ්‍යතාව මෙන් ම ඒ සඳහා ගත යුතු ක්‍රියාමාර්ග සම්බන්ධ ව ද සාකච්ඡා කෙරුණු අතර අධ්‍යාපන ලේකම්, මහාචාර්ය කේ. කපිල සී. කේ. පෙරේරා මහතා සහ අතිරේක ලේකම් (ප්‍රතිපත්ති, සැලසුම් හා කාර්ය සාධන සමාලෝචන), ආචාර්ය මදුරා එම්. වේහැල්ල මහත්මිය ද මෙම සම්මේලනය සඳහා සහභාගී වූහ.
