නුවරඑළිය සදතැන්න පාරිසරික සංචාරක කලාපය සතිඅන්ත හා රජයේ නිවාඩු දිනවල නැවත වීවෘත කිරීම හා එය සංචාරක ආකර්ෂණීය ගමනාන්තයක් ලෙස තවදුරටත් දියුණු කිරීම සම්බන්ධයෙන් පසුගිය දා (17) පැවති විශේෂ සාකච්ඡාවක දී මෙම තීරණයට එළඹීණි. සාකච්ඡාව පැවැත්වුණේ සංචාරක අමාත්‍යාංශයේදීයි.
සඳතැන්න පාරිසරික සංචාරක කලාපය 2014 වර්ෂයේ දි වීවෘත කෙරුණ අතර ඉතා ඉහළ දෙස් විදෙස් සංචාරක ආකර්ෂණයක් සහිත ප්‍ර දේශයකි. කෘෂිකාර්මික දෙපාර්තුමේන්තුවට අයත් නුවරඑළිය සීතා බීජ අර්තාපල් ගොවිපළ ආශ්‍රිතව පිහිටා ඇති මෙම සංචාරක කලාපයේ ප්‍ර වේශ මාර්ගය වැටී ඇත්තේ ද එම ගොවිපළ මැදිණි. මෙම ස්ථානයට පිදුරුතලාගල, කිරිගල්පොත්ත, හග්ගල හා නමුණුකුළ වැනි ප්‍රධාන කදු පන්ති 09 ක් දක්නට ලැබීම විශේෂත්වයකි.
මුහුදු මට්ටමින් අඩි 1600 කටත් වඩා උසින් යුතු මෙම සංචාරක කළාපය හෙක්ටයාර් එකසිය පනස් පහකින් යුක්තය. භූමියේ උඩම කොටස අඩි පන්දහස් තුන්සීයක පමණ උසකින් යුක්ත වන අතර එය හෝර්ටන්තැන්නේ උසට සමානය. මෙම සංචාරක කළාපය තුළ කදුකර පහත්බිම්, කදුකරයට ආවේණික සත්ත්ව හා ශාඛ රැසක් දක්නට හැකිය. වසංගතය නොමැති දිනවල මෙම සංචාරක කළාපයේ දෛනික ආදායම රුපියල් ලක්ෂය ඉක්වමා තිබිණි.
මෙම සඳතැන්න පාරිසරික සංචාරක කලාපය පිහිටා ඇති රජයේ බීජ අර්තාපල් ගොවිපළේ සේවකයන්ට අමතර දීමනා ලබා නොදීමේ ගැටළුවක් මත පසුගිය ජනවාරි 27 වන දා සිට මෙම ගොවිපළ සතිඅන්තයේ හා රජයේ නිවාඩු දිනවල වසා දැමිම නිසා දෙස් විදෙස් සංචාරකයන්ට මෙම සංචාරක කළාපයට එම දිනවල පිවිසිමට නොහැකි විය. මේ තත්ත්වය වාර්තා විමෙන් පසු සංචාරක ඇමති ප්‍රසන්න රණතුංග මහතා ඊට අදාළ සියලු පාර්ශවයන් කැදවා ගැටළුව විසදීමට කටයුතු කළේ ය
ඇමති ප්‍රසන්න රණතුංග මහතා මෙහි දි බළධාරින්ට කියා සිටියේ කොවිඩ් වසංගතයෙන් පසු සංචාරකයන් යළි රටට පැමිණෙමින් පවතින මේ අවස්ථාවේ දි සංචාරක කළාප වසා දැමීමට කිසිසේත් එකග විය නොහැකි බවයි. රජය තව තවත් ආකර්ෂණීය සංචාරක ගමනාන්ත හදුනාගනිමින් ඒවා දියුණු කිරිමට සැලසුම් කරද්දි පවතින සංචාරක කලාප වෙනත් ගැටළු මත වසා දැමීමට ඉඩ දිය නොහැකි බව ද ඔහු කීවේය.
මෙම සඳතැන්න පාරිසරක සංචාරක කලාපය දියුණු කිරිම සදහා සංචාරක සංවර්ධන අධිකාරිය රුපියල් බිලියන 17.2 ක ආයෝජනයක් සිදු කර ඇති බව පෙන්වා දුන් ඇමතිවරයා එය නැරඹීම සදහා පැමිණෙන දෙස් විදෙස් සංචාරකයන්ට අවශ්‍ය පහසුකම් සැලසිම සියලු පාර්ශවයන්ගේ වගකිම බව ද පෙන්වා දුන්නේය.
කෘෂිකර්ම අධ්‍යක්ෂක ජෙනරාල්වරයා මෙහි දී ඇමතිවරයාට කියා සිටියේ මේ සේවකයන්ට අතිරේක දීමනා ලබාදීමට අවශ්‍ය කටයුතු සිදු කෙරෙමින් පවතින බවයි. සඳතැන්න සංචාරක කළාපයේ ජීප් රථ රියදුරන්ගේ සංගමය ඉදිරිපත් කල ගැටළු කීපයකට ද කඩිනමින් විසදුම් ලබාදීමට ඇමතිවරයා කටයුතු කළේය.
මෙම කලාපයට පිවිසෙන කිලෝමිටර් 04 ක මාර්ගය කඩිනමින් කාපට් කර ප්‍රතිසංස්කරණය කර දීම, එම කලාපය නැරඹීමට පැමිණෙන දෙස් විදෙස් සංචාරකයන්ට අවශ්‍ය පහසුකම් සැලසීම සදහා කඩිනම් පියවර ගැනීමට ද මෙහි දී තීරණය කෙරිණි. එම ස්ථානය දියුණු කිරීමේ දි එම ස්ථානයේ පාරිසරික තත්ත්වයට ගැළපෙන පරිදි කටයුතු කරන ලෙස ද ඇමතිවරයා මෙහිදි බළධාරින්ට උපදෙස් දුන්නේය. සංචාරක කලාපය උදෑසන 06 ට විවෘත කිරීමට අවශ්‍ය පියවර ගන්නා ලෙස ද ඇමතිවරයා මෙහි දී බළධාරින්ට උපදෙස් දුන්නේය.
සංචාරක අමාත්‍යාංශයේ ලේකම් එස්. හෙට්ටිආරච්චි, කෘෂිකර්ම දෙපාර්තුමේන්තුවේ අධ්‍යක්ෂක ජෙනරාල් මහාචාර්ය අජන්ත ද සිල්වා, සංචාරක සංවර්ධන අධිකාරියේ අධ්‍යක්ෂක ජෙනරාල් ධම්මිකා විජේසිංහ, සදතැන්න සංචාරක කළාපයේ සෆාරි රියදුරු සංගමයේ නියෝජිතයන් මෙම සාකච්ඡාවට එක්ව සිටියහ.
