ක්‍රියාන්විත රාජකාරිවල දී යම් ලෙසකින් රාජකාරි කරන අයකු අභාවයට පත් වුවහොත් එම පුද්ගලයාගේ නියමිත කාලය අවසන්වනතුරු වැටුප් ලබාදෙන බව පැවසූ අමාත්‍යවරයා, මෙම පොලිස් නිලධාරීන් සඳහා ද එසේ වැටුප් හිමිවිය යුතු බව පෙන්වා දුන්නේය.
මහජන ආරක්ෂක අමාත්‍යංශයේ ලේකම් මේජර් ජෙනරාල් ජගත් අල්විස් , පොලිස්පති චන්දන වික්‍රමරත්න , ජ්‍යෙෂ්ඨ නියෝජ්‍ය පොලිස්පතිවරු සහ නියෝජ්‍ය පොලිස්පතිවරු සමඟ zoom පහසුකම ඔස්සේ රැස්වීමකට සහභාගි වෙමින් අමාත්‍යවරයා මේ බව කියා සිටී.
රටේ අභ්‍යන්තර ආරක්ෂාව සඳහා වැඩි අවධානයක් යොමු කරන ලෙස පොලීසියට උපදෙස් ලබා දුන් අමාත්‍යවරයා මෙම දරුණු වසංගත තත්වය තුළ වුවද මත්ද්‍රව්‍ය ක්‍රියාකාරකම් වැටලීම්, පාතාල ක්‍රියාකාරකම්වලට හිස එසවීමට ඉඩ නොදීම වෙනුවෙන් එහිදී සියලු පොලිස් නිලධාරීන්ට සිය ස්තුතිය පුද කළේය.
එල්ටීටීඊ සංවිධානය , ත්‍රස්තවාදී සංවිධානයක් වන අතර එය පහසුවෙන් හඳුනා ගැනීමට හැකියාව තිබූ බවත් isis සංවිධානයක් නොව මතවාදයක් බැවින් එය හඳුනාගැනීම පහසු කරුණක් නොවන බවත් පෙන්වාදුන් අමාත්‍යවරයා, මෙවැනි ක්‍රියාකාරකම්වල යෙදෙන පුද්ගලයන් පළමුව හුදෙකලා වන අතර ඉන්පසු අන්තවාදයට ත්‍රස්තවාදයට ගමන් කළ හැකි බවත් ඒ පිළිබඳව විධිමත් අවධානයෙන් සිටින ලෙසත් එහිදී අදාළ නිළධාරීන්ට උපදෙස් ලබා දී ඇත.
අපරාධ භාර ජ්‍යෙෂ්ඨ නියෝජ්‍ය පොලිස්පතිවරයා යටතේ විශේෂ විමර්ශන කණ්ඩායම් දෙකක් පිහිට වන අතර ඉන් එක් කණ්ඩායමක් කප්පම් සහ පාතාලය සම්බන්ධව ද අනෙක් කණ්ඩායම කුඩු ජාවාරම සම්බන්ධ මෙහෙයුම් සඳහා ද පත් කරන බවද අමාත්‍යවරයා වැඩිදුරටත් පැවසීය.
එසේම ජනතාවගේ සෞඛ්‍ය සුරක්ෂිතතාවය වෙනුවෙන් කටයුතු කළ පොලිස් නිලධාරීන් 11,700ක් මේ වන විට කොරෝනා වෛරසයට ගොදුරු වී ඇති බවද අමාත්‍යවරයා පැවසීය.
