මාර්ග අනතුරු නිසා දිනකට ශ්‍රී ලංකාවේ මරණ 7ක් හෝ 8ක් වාර්තා වන බවත් මෙය යුද්ධයේදී මිය ගිය පිරිසටත් වඩා වැඩි බවත් සඳහන් කල අමාත්‍යවරයා විදේශීය තාක්ෂණය යොදා ගනිමින් ප්‍රවාහන ක්ෂ්‍රේත්‍රය ඉදිරියට ගෙන යාමට කටයුතු කරන බවද සඳහන් කර සිටියේය.
අමාත්‍යවරයා මේ බව පැවසුවේ ආර්ථික කටයුතු හා බලශක්ති පිලිබඳ ජර්මානු ෆෙඩරල් අමාත්‍යංශය සංවිධානය කර තිබූ තිරසාර සංචාලතාව නමින් අද(28) කොළඹ පැවති ජර්මානු - ශ්‍රී ලංකා සමුළුවට එක්වෙමිණි.
ජනාධිපතිතුමාගේ ප්‍රතිපත්ති ප්‍රකාශයට අනුව කටයුතු කරමින් වායු දූෂණය අවම කරමින් පරිසර හිතකාමී ප්‍රවාහන සේවයක් ගොඩ නැගීමටද මෝටර් රථ දෙපාර්තමේන්තුව, දුම්රිය දෙපාර්තමේන්තුව, ජාතික ගමනා ගමන කොමිෂන් සභාව,ජාතික ප්‍රවාහන වෛද්‍ය ආයතනය යන සියළු ආයතන එක්ව කටයුතු කරන බවද අමාත්‍යවරයා වැඩිදුරටත් සඳහන් කර සිටියේය.
මෙම සමුළුව සඳහා ශ්‍රී ලංකාවේ සහ මාලදිවයිනේ ජර්මානු තානාපති ජෝර්න් රෝඩ්, ආර්ථික කටයුතු හා බලශක්ති පිලිබඳ ජර්මානු ෆෙඩරල් අමාත්‍යංශයේ සංචලතා සංකල්ප හා ප්‍රවාහන ප්‍රතිපත්ති ඒකකයේ ප්‍රධානී ආචාර්ය හෙසල්මන් , ජර්මානු කර්මාන්ත හා වාණිජ ප්‍රධාන නියෝජිත ඇන්ඩ්රියාස් හර්ගන්රොදර් යන මහත්වරු සහ දේශපාලනික සහ ව්‍යාපාරික ක්ෂේත්‍රයේ විද්වතුන් 100ක් පමණ මෙම අවස්ථාවට එක්ව සිටියහ
