නියමිත වේලාවට පැය දෙක තුනක කාල පරාසයකට සිට නිරීක්‍ෂණය කිරීම වඩාත් සුදුසු බවත් එනම් දවල් 10.00 සිට 12.30 දක්වා කාලය තුළ නිරීක්ෂණය කිරීමට බලාපොරොත්තුවන බව ද ශ්‍රී ලංකා ග්‍රහලෝකාගාරය පවසයි.

අභ්‍යවකාශයට යවන ලද රොකට්ටුවක කැබැල්ලක් නොවැම්බර් 13 වෙනි සිකුරාදා දවල් 11.45ට පමණ ශ්‍රී ලංකාවෙහි දකුණු මුහුදු වෙරළෙහි සිට සැතපුම් 62ක් පමණ දුරින් මුහුදට වැටෙන බව සොයාගෙන තිබේ.

මෙම ආකාශ වස්තුව මිනිසා විසින් යවන ලද රොකට්ටුවක කොටසක් හෝ 1960,70 ගනන් වල හඳට යවන ලද ඇපලෝ යානයක කොටසක් යැයි විශ්වාස කෙරේ.

මෙහි ප්‍රමාණය මීටර දෙකක් පමණ, (අඩි 6 ,5ක් පමණ) වන අතර මේ රොකට් කැබැල්ල නිරීක්ෂණය කිරීමට තරම් ප්‍රමාණවත් ආලෝකයකින් මුහුදට වැටෙතැයි යුරෝපීය අභ්‍යවකාශ ඒජන්සියෙහි පෘථිවියට ආසන්න ආකාශ වස්තූන් අධ්‍යයනය කරන මධ්‍යස්ථානය පවසයි.මෙයින් වැඩි කොටසක් පෘථිවි වායුගෝලයේදී දැවී යන අතර ඉතිරි කොටස මුහුදට වැටෙතැයි විශ්වාස කෙරෙන අතර ඇතැම් විට සම්පූර්ණයෙන්ම දැවී යාමටද ඉඩ තිබේ.

මෙය ස්වාභාවික ආකාශ වස්තුවක් නොවේ. රොකට්ටුවක කොටසක් කියල මෙම මධ්‍යස්ථානය තහවුරු කළේ මෙහි ගමන් වේගය අධ්‍යයනය කිරීමෙන් සහ ඝනත්වය අනුවයි. විද්‍යාඥයින්ට මෙවැනි ආකාශ වස්තුවක් පෘථිවි වායු‍ගෝලය සමඟ ගැටීම අධ්‍යයනය කිරීමට ලැබුණු අවස්ථාවක් බවත් විද්‍යා, තාක්ෂණ හා පර්යේෂණ අමාත්‍යංශය පවසයි.

ඉතාමත් කුඩා ප්‍රමාණයේ ආකාශ වස්තුන් ලක්ෂ 05 කටත් වඩා අභ්‍යවකාශයෙහි තිබෙන බවත් අඟල් 4 කට වඩා වැඩි ප්‍රමාණයේ ආකාශ වස්තුන් 20,000 ක් පමණ නාසා ආයතනය අභ්‍යවකාශයෙහි නිරීක්ෂණයට හසු කරගෙන තිබේ. මෙවැනි ආකාශ වස්තුන්වල වේගය පැයට සැතපුම් 17,500 ක් හෝ ඊට ඉහළය. විශේෂයෙන්ම අන්තර්ජාතික අභ්‍යවකාශ මධ්‍යස්ථානය මෙවැනි තර්ජන වලින් ගැලවෙන්නේ කෙසේ දැයි සොයා බැලීමට නිරතුරුවම පරීක්‍ෂණ පවත්වයි.