අමාත්‍යවරයා මේ බව සඳහන් කර සිටියේ ඊයේ (22) ජාතික විද්‍යා පදනමේ "මැදි ආදායම් උගුල ජයගෙන රට පෙරට යන්නේ කෙසේද?" මැයෙන් පැවති තාක්ෂණ හා පර්යේෂණ සංවර්ධන පස් අවුරුදු ආයෝජන සැලසුම් පළමු පසු විපරම් විශේෂ ආර්ථීක කථීකාව අරඹමිනි.

• තාක්ෂණ වාර්ෂික වියදම දිනෙක සිගරට් පානය සඳහා වන වියදමට සමානයි.

දැනුම පදනම් කරගත් ආර්ථීකයක් කරා ගමන් කිරීමට අපිට තිබෙන හැකියාවන්, බාධාවන් මොනවාද යන්න පිළිබඳව අප සාකච්ඡාවට බඳුන් කළ යුතු කාලය එළඹ තිබේ. පසුගිය කාලය පුරාවටම තාක්ෂණ පර්යේෂණ ක්ෂේත්‍රයට ආයෝජනය කර ඇත්තේ ඉතාම අඩු ප්‍රමාණයක් බවට චෝදනා පැන නැගිණ. තාක්ෂණ හා පර්යේෂණ අමාත්‍යාංශයේ (ආයතන 15 ද ඇතුළුව) වාර්ෂික මුළු වියදම රුපියල් බිලියන 3 - 3.5 අතර අගයක් ගනී.  වර්ෂයකට රුපියල් මිලියන 300ක් (බිලියන 0.3) පමණ පර්යේෂණ කටයුතු සඳහා ඍජුවම යොමු කරන අතර අනෙක් රටවලට සාපේක්ෂව බලන විට මෙය ඉතා සුළු ප්‍රමාණයකි. ශ්‍රී ලංකාවේ දළ ජාතික ආදායම රුපියල් බිලියන 8500කි. ඒ අනුව තාක්ෂණ හා පර්යේෂණ අමාත්‍යාංශයේ වියදම දළ ජාතික ආදායමෙන් 0.035% කි. ලංකාවේ පර්යේෂණ සඳහා ඍජුවම වසරකට වියදම් කරන රුපියල් මිලියන 300 දෙස බලන විට අප කනගාටු විය යුතු බවත් ඊට හේතුව ලංකාවේ දිනකට සිගරට් පානයට මිලියන 300ක් වියදම් කිරීම බවත් අමාත්‍යවරයා පෙන්වා දුන්නේය.
 

ශ්‍රී ලංකාව විවෘත ආර්ථීකයට පිවිසී අද වන විට අවුරුදු 40ට ආසන්න වුවද විවෘත ආර්ථීක ප්‍රතිපත්තිය අප රට හා සමාන්තරව ක්‍රියාත්මක කළ රටවල් අද පවතින තත්ත්වය හා සැසඳීමේදී අප ඉතා පහළ මට්ටමක සිටින බව පැහැදිලි වේ. ශ්‍රී ලංකාවට සමාන්තරව විවෘත ආර්ථීකය ක්‍රියාත්මක කළ රටවල් 11ක් ඒක පුද්ගල ආදායම ඩොලර් 12000 සීමාව එනම්, අධි ආදායම් සීමාවට ළඟා වී ඇති අතර ඉන් රටවල් 07ක් පමණ තෙල්, ගෑස් හා ගල්අඟුරු මත පදනම්ව එම තත්ත්වයට ළඟා වී තිබේ. අනෙකුත් රටවල් මැදි ආදායම් උගුලට හසු නොවී සංවර්ධනය වී ඇත්තේ ප්‍රධාන වශයෙන්ම විද්‍යාව හා තාක්ෂණය මත විශ්වාසය තබා  නවෝත්පාදනය, දැනුම මුල් කරගත් ආර්ථීකයක මත පදනම් වීමෙනි.

• 1960 සිට ආර්ථීකය 1200 ගුණයකින් වර්ධනය වෙලා

අද නොයෙක් දෙනා සංඛ්‍යා ලේඛන ඉදිරිපත් කරමින්, ආර්ථීක වර්ධනය පිළිබඳව නොයෙකුත් අර්ථකථන ඉදිරිපත් කරති. සංඛ්‍යා ලේඛන වැදගත් නමුත් ඒ සංඛ්‍ය ලේඛන දෙස විචාරාත්මකව බැලීමේදී විජ්ජා සහගත බවක් පෙනීයන බව ද අමාත්‍යවරයා පෙන්වා දෙයි. 1960 දි ලංකාවේ දළ ජාතික නිෂ්පාදනය රුපියල් බිලියන 6.5කි. වර්තමානයේ බිලියන 8500කි. ඉන් පැහැදිලි වන්නේ 1960 සිට මේ දක්වා ආර්ථීකය 1200 ගුණයකින් වැඩිවී ඇති බවයි. ඩොලර්වලින් එය මනින කළ 47 ගුණයකි. නමුත් උද්ධමනය ඉවත් කළ විට මේ ප්‍රමාණය 12 ගුණයකි. සංඛ්‍ය ලේඛන විජ්ජාව තුළ සිදුවන්නේ මෙවන් ක්‍රියාවලියක් බවත් මෙම සංඛ්‍යා ලේඛන විජ්ජාවට කොටු නොවී යථාර්ථවාදීව අප මේ දෙස බලා සාකච්ඡා කළ යුතු බවද අමාත්‍යවරයා පෙන්වා දුන්නේය.

• අඩු පොලිය වුවත් රුපියල අව ප්‍රමාණය නිසා ණය පැටව් ගැසේ.

බොහෝ දෙනෙක් ඉතාමත් සහන මිලට, අවුරුදු 40ට, 1% පොලියට ඩොලර්වලින් ණය ලබාගැනීමට හැකි වූ බව පවසති. එහෙත් සෑම අවුරුදු 08කට වරක්ම මේ ණය දෙගුණ වෙයි. අවුරුදු 18කට පසු 04 ගුණයක් වෙයි. මෙලෙස අවුරුදු 40 ගතවන විට 32 ගුණයක් පමණ වෙයි. පසුගිය කාලය තුළ 8%ක ‍වේගයකින් රුපියල අව ප්‍රමාණ වී තිබේ.

• සංචාරක ආර්ථීකය ඩෙංගු මදුරුවාටද විනාශ කළ හැකිය.

අද ආර්ථීකයේ ක්‍රියාදාමය වී ඇත්තේ සේවා ආර්ථීකය ප්‍රවර්ධනය කිරීමයි. නමුත් අපේ රටට සේවා ආර්ථීකය තවදුරටත් පුළුල් කිරීම මඟින් ම අපට අවශ්‍ය කරන ආර්ථීක වර්ධනය තිරාසාරව පවත්වාගෙන යාමට හැකිද යන්න ගැටලුවකි. මේ සේවා ආර්ථීකය දේදුණු පැහැයෙන් යුක්ත සබන් බුබුළක් හා සමාන බවත් තිරසර නොවන ක්‍රියාදාමයක අප අත්පොළසන් දෙමින් ගමන් කරනා බවද අමාත්‍යවරයා සඳහන් කළේය. රටේ ආර්ථීකයේ ඉදිරි ගමන් මඟ කුමක්ද මේ යන ආකාරයටම අපට ඉදිරියට යන්න පුළුවන් ද විනෝදාස්වාද ආර්ථීකය සංචාරක ව්‍යාපාරය මුල් කරගත් ආර්ථීකයකින් සේවා ආර්ථීකය මුල්කරගත් ආර්ථීකයකින් රට ගොඩනගන්න පුළුවන්ද තිරසාරව ඉදිරියට යන්න පුළුවන්ද නවෝත්පාදන ආර්ථීකයක් තුළින් රට ගොඩනගන්නේ කෙසේද යන්න පිළිබඳ සංවාදයට අප පිවිසිය යුතුයි. සංචාරක සේවාවන් මත දුවන ආර්ථීකයක් ඩෙංගු මදුරුවාට වුව විනාශ කළ හැකිය. මන්ද ඩෙංගු ඇති රටකට සංචාරකයින් නොඑන නිසාය.

විද්‍යා තාක්ෂණ ක්ෂේත්‍රයට 1%ක් ආයෝජනය කළොත් දළ ජාතික නිෂ්පාදනය 0.036%කින් වැඩි වන බවත් ආර්ථීක වර්ධනයෙන් පමණක් රටක් මැනිය නොහැකි අතර පරිසර සංරක්ෂණය, සමාජ සමානාත්මතාව, ඇති වන නවෝත්පාදන ආර්ථීකයක් කරා ගමන් කළ යුතු බවද අමාත්‍යවරයා වැඩිදුරටත් පෙන්වා දුන්නේය.

මෙම ආර්ථීක කථීකාවත සඳහා ආර්ථීක විශේෂඥ සම්මානිත මහාචාර්ය එස්. එස්. කොළඹගේ සහ කොළඹ විශ්වවිද්‍යාලයේ කථීකාචාර්ය ආචාර්ය ලලිතසිරි ගුණරුවන් යන අයද සහභාගී වූහ.

HC/R&D