මෙහිදී වැඩිදුරටත් අදහස් දැක්වූ අමාත්‍යවරයා පැවසුවේ මෙම පැල්පත් නගරයට අගෞරවයක් බැවින් ඒවා ඒ ආකාරයෙන් පවත්වාගෙන ඒම පිළිබදව අපි ලජ්ජාවිය යුතු බවයි. පැල්පත් වෙනුවට තට්ටු නිවාස ඉදිකිරිමේදී එක් නිවසක් ඉදිකිරිමට මිලියන 4ක් වැයවෙන බව පෙන්වා දුන් අමාත්ය වරයා මේ මුදල පැල්පත්වාසීන්ට එක්වර දැරිය නොහැකි බැවින් රජය ඒ පිළිබද දායකත්වය දැරීමට තීරණය කර තිබෙන බවද පැවසීය. ඒ අනුව අදාල මිලියන හතරෙන් මිලියන තුනක් රජය මගින් ලබාදෙන අතර ඉතිරි මිලියනයක මුදල ඔවුන්ට අපහසුවක් නොවන පරිදි මාසිකව රුපියල් 2500ක් බැගින් වසර 30කින් ගෙවී යන පරිදි නිවෙස් හිමියන්ගෙන් එය අයකරගැනීමට කටයුතු කිරීමට බලාපොරොත්තු වන බවද අමත්‍යවරයා වැඩිදුරටත් පැවසීය.
අමාත්‍යවරයාගේ දැනුම්දීම අනුව මහනුවර මහනගර සභාව සතු අක්කර 2 කට ආසන්න ඉඩම ඒ සදහා ලබා දීමට මහනගර සභාවේ නාගරික කොමසාරිස් චන්දන තෙන්නකෝන් මහතා එකග වූ බැවින් එම ස්ථානයේ නිවාස සංකීර්ණය ඉදි කිරිමට මහනුවර දිස්ත්‍රික් සම්බන්ධිකරණ කමිටුවේ එකගත්වය ලබා දිය හැකි බවට මහනුවර දිස්ත්‍රික්කයේ සියළු දේශපාලන නායකයන්ගේ එකගත්වය ලැබුනි.
මෙහිදී අදහස් දැක්වු චම්පික රණවක අමාත්‍යවරයා පෙන්වා දුන්නේ කොළඹ නගරයේද පැල්පත් වාසීන් 70,000ක් පමණ ජීවත් වන බවට හදුනාගෙන ඇති අතර 2020 වනවිට පැල්පත් වෙනුවට තට්ටු නිවාස 40,000ක් ඉදිකිරීමට සැලසුම්කර ඇති බවයි. එයින් 20,000ක වැඩ කටයුතු මේ වන විට ආරම්භ කොට ඇති බවත් පැවසූ අමාත්‍යවරයා සෙසු මහනගර සභා බල ප්‍රදේශවලද මෙම ව්‍යාපෘතිය දියත් කිරීමට තම අමාත්‍යංශය කටයුතු යොදන බව පැවසීය.
AP/DMU-Kandy
