මෙම ඉගෙනුම් කළමනාකරණ පද්ධතිය සඳහා 1 ශ්‍රේණියේ සිට 13 ශ්‍රේණිය දක්වා සියලු ම විෂයයන් සඳහා සිංහල, දෙමළ යන භාෂා දෙකෙන් ම පෙළපොත, විෂය නිර්දේශ, ගුරු මාර්ගෝපදේශ සංග්‍රහ, විෂයානුබද්ධ මෘදුකාංග, ප්‍රශ්න උත්තර සංචිත, සිසු සටහන් පොත්, පුනරීක්ෂණ ප්‍රශ්නපත්‍ර, පසුගිය වාර විභාග ප්‍රශ්නපත්‍ර, ජාතික මට්ටමේ විභාග (අ.පො.ස (උ/පෙළ) /අ.පො.ස (සා.පෙළ) ) ප්‍රශ්නපත්‍ර, පිළිතුරුපත්‍ර, අමතර කියවීම් ඇතුළත් කිරීම මූලික වශයෙන් සිදු කෙරෙන අතර මේ වන විට 1 සිට 5 ශ්‍රේණි දක්වා මෘදුකාංග සම්පූර්ණ කර ඇතුළත් කර ඇත. එසේම 6 සහ 10 ශ්‍රේණි සඳහා වන විෂය මාලාවෙන් 75%  පමණ ආවරණය කර ඇති අතර 6 සිට 11 ශ්‍රේණිය දක්වා විභාග ප්‍රශ්නපත්‍ර ඇතුළත් කර ඇත. මෙම වෙබ් අඩවිය දිනපතා යාවත්කාලීන වන අතර මේ වන විට පරිශීලකයින් 5000 ක් පමණ මේ තුළ ලියාපදිංචි වී ඇත. දිනකට පරිශීලකයන් 60,000 – 90,000ක් අතර ප්‍රමාණයක් වෙබ් අඩවිය පරිශීලනය කරනු ලබයි.

ඉ-ස්වාභිමානී 2014 තරගය සඳහා e-Learning and Education කාණ්ඩය යටතේ ඉල්ලුම් කළ නිර්මාණ අතරින් අවසාන වටයට තේරීපත් වූ නිර්මාණ 5 න් හොඳම නිර්මාණය ලෙස ඉ-තක්සලාව තේරීපත් වීම අධ්‍යාපන අමාත්‍යාංශය ලෙස ලද විශිෂ්ට ජයග්‍රහණයකි. මහින්ද චින්තන ඉදිරි දැක්ම යටතේ දැනුම් කේන්ද්‍රය (Knowledge hub) ලෙස ශ්‍රී ලංකාව ජාත්‍යන්තරයට ගෙන යාමේ නව පියවරක් අධ්‍යාපන අමාත්‍යාංශය ඉදිරියට තබා ඇති බව තහවුරු කරමින් ඉ-ස්වාභිමානී සම්මානයෙන් නොනැවතී දකුණු ආසියානු සහ ආසියානු පැසිපික් කලාපය ආවරණය කරමින් පවත්වනු ලබන e-නිර්මාණ ඇගයීමේ තරගය වන ‘Manthan Award’ සඳහා ද “e-තක්සලාව” නම යෝජනා වී තිබීම ශ්‍රී ලංකාව තොරතුරු හා සන්නිවේදන තාක්ෂණ ක්ෂේත්‍රයෙන් ජාත්‍යන්තර කීර්තියට පත් වීම සනිටුහන් කරයි. මෙලෙස ඉදිරිපත් කරන ලද නාමයෝජනා අතුරින් එම තරගයේ ද e-Learning and Education කාණ්ඩයේ අවසන් වටයේ තරගකරුවන් අතරට තේරී පත් වීම ද සුවිශේෂී ජයග්‍රහණයකි.

e-තක්සලාව සඳහා වූ මෙම ජයග්‍රහණය ඉතා සුවිශේෂී වන්නේ අධ්‍යාපන අමාත්‍යාංශයේ පූර්ණ දායකත්වයෙන් සිදුකිරීමත් සහ එය සම්පූර්ණයෙන් ම රජයේ පාසල්වල උගන්වනු ලබන දේශීය ගුරු භවතුන්ගේ දැඩි කැපවීමකින් යුතුව සමස්තයම නිර්මාණය වී ක්‍රියාත්මක කරනු ලබන ඉගෙනුම් අන්තර්ගත කළමනාකරණ පද්ධතිය ද වන බැවිනි. මෙම ජයග්‍රහණයේ සැබෑ හිමිකරුවන් වන්නේ මෙම අභියෝගාත්මක නිර්මාණකරණය සහ පද්ධතිය ස්ථාපිත කර පවත්වාගෙන යාම සඳහා වෙහෙස වන දේශයේ ගුරුභවතුන් වේ.

NDH/moe