එබැවින් මේ සම්බන්ධයෙන් වහාම සියලු දෙනා අවධානය යොමු කර ඩොල්ෆින් මසුන් ආරක්ෂා කර ගැනීමේ වැඩ පිළිවෙළක් ක්‍රියාත්මක කළ යුතු බව ධීවර හා ජලජ සම්පත් සංවර්ධන අමාත්‍ය මහින්ද අමරවීර මහතා අමාත්‍යාංශයේ නිලධාරින්හට පසුගියදා දැනුම් දුන්නේය.
ධීවර අමාත්‍යංශයේදී පැවති උපදේශක සභාව අමතමින් ඇමතිවරයා කියා සිටියේ මරුවැල්වල යොදා තිබෙන ඇම ආහාරයට ගැනීම සඳහා පැමිණෙන ඩොල්ෆින් මසුන් එම බිලී කොකුවලට හසුව මිය යන බවයි. එම නිසා මරුවැල් පන්න ක්‍රමයේදි යොදා ගන්නා ඇමට ඩොල්ෆින් මසුන් ආකර්ශණය වීම වැළැක්විමේ නව උපාංගයක් මේ වන විට ජාත්‍යන්තර ධීවර කර්මාන්තයේදී භාවිතා කෙරෙන අතර එම උපාංගය වහාම මෙරටට ගෙන්වා ඒවා ධීවරයින් හට නොමිලේ ලබා දීමට ලබන වසරේදී පියවර ගන්නා ලෙස ද අමාත්‍යවරයා කීය.
මෙම උපාංගය බිලී කොකුවලට කොපුවක් (cliff) වශයෙන් යෙදිය හැකි අතර, එමඟින් ඩොල්ෆින් මසුන් ඇම ඩැහැගත්ත ද ඔවුන්ට හානියක් සිදු වන්නේ නැත.ජාත්‍යන්තර ධීවර නීතිය අනුව ඩොල්ෆින් මසුන් හෙවත් ධීවර ප්‍රජාව විසින් මුල්ලා මසුන් ලෙස හඳුන්වන එම මත්ස්‍ය විශේෂය ඇල්ලීම සම්පුර්ණයෙන්ම තහනම් කර ඇත.
ශ්‍රී ලංකාවේ වාර්ෂික මත්ස්‍ය අපනයනය දෙස බැලිමේදී 2016 වසරේ ඇමරිකා එක්සත් ජනපදය විසින් අප රටේ සමස්ත මත්ස්‍ය අපනයනයෙන් සියයට 29ක් හෙවත් මෙට්‍රික් ටොන් 4088ක් මිලදි ගෙන ඇත.
ධීවර ප්‍රජාව විසින් ඩොල්ෆින් මසුන් හසුවිම වැළැක්වීමට අවශ්‍ය පියවර නොගතහොත් ශ්‍රි ලංකාවේ මත්ස්‍ය සම්පත සම්බන්ධයෙන් ඇමරිකා එක්සත් ජනපදයේ ඇති වෙළඳපොල අපට අහිමි වීමට ඉඩ ඇති අතර එම නිසා මේ සම්බන්ධයෙන් ඉහත දැක් වු උපාංග මිලදී ගෙන බෙදා හරින ලෙස අමාත්‍යංශයේ ලේකම් මංගලිකා අධිකාරී මහත්මියට අමාත්‍යවරයා විසින් උපදෙස් දෙනු ලැබිය.
