මෙම අති නවීන යන්ත්‍රය සදහා සෞඛ්‍ය අමාත්‍යංශය රුපියල් මිලියන 50 ක මුල්‍ය පිරිවැයක් දරමින් යාපනය ශික්ෂණ රෝහලට ලබා දී ඇති අතර, මෙම යන්ත්‍රය ශල්‍යකර්ම වලදී අස්ථි ස්කෑන් කර පරීක්ෂාවන් සිදු කිරීම සඳහා යොදා ගැනේ.
මෙරට පළාත් සභා සහ මධ්‍යම රජය යටතේ පාලනය වන රජයේ රෝහල් පද්ධතිය වඩාත් විධිමත්ව සහ ඉහළ පහසුකම් වලින් සමන්විත රෝගී සත්කාර සේවා සමගින් පවත්වා ගෙන යාම මුලික අරමුණ කර ගනිමින් දිස්ත්‍රික්ක මට්ටමින් එම රෝහල් වල පවතින අඩුපාඩු සොයා බලමින් සහ කඩිනම් විසදුම් ලබා දෙමින් මෙරට ජනතාවට ගුණාත්මක විධිමත් සෞඛ්‍ය සේවාවක් ලබාදීමට ක්‍රියාත්මක විශේෂ වැඩපිළිවෙළට සමගාමීව සෞඛ්‍ය අමාත්‍යවරයා ප්‍රමුඛ නිලධාරීන් යාපනය ශික්ෂණ රෝහල තුළ මෙම නිරීක්ෂණය සිදුකරන ලදී.
මෙහිදී අමාත්‍යවරයා සහ නිළධාරීන් විසින් රෝහලේ බාහිර රෝගී අංශය, සායන, වාට්ටු, අක්ෂි ඒකකය, මුළුතැන්ගෙය, රසායනාගාරය, ඖෂධ ගබඩා, ශල්‍යාගාර, හදිසි ප්‍රතිකාර ඒකක, සහ විශේෂ ඒකකද නිරික්ෂණයට ලක් කරන ලද අතර නිරීක්ෂණ චාරිකාවෙන් අනතුරුව රෝහල් කාර්ය මණ්ඩලය සමඟ විශේෂ සාකච්ජාවක නිරත වූ සෞඛ්‍ය අමාත්‍යවරයා ඔවුන්හට පවතින රාජකාරී ගැටලු හා අනෙකුත් ගැටලු පිළිබඳව විමසමින් ඒවාට විසඳුම් ලබාදීමට ද කටයුතු කරන ලදී.
මෙහිදී අදහස් දක්වමින් සෞඛ්‍ය හා කර්මාන්ත අමාත්‍ය වෛද්‍ය රමේෂ් පතිරණ මහතා කියා සිටියේ ......
උතුරු පලාතේ යාපනය දිස්ත්‍රික්කය ප්‍රමුඛ යාබද දිස්ත්‍රික්කවල ජනතාවට සුව සෙත සලසන ප්‍රධානතම රෝහල වන යාපනය ශික්ෂණ රෝහලේ පවතින අඩුපාඩු සොයා බලා ඒවාට කඩිනම් විසඳුම් ලබා දෙමින් මෙම පලාතේ ජනතාවට ගුණාත්මක, කාර්යක්ෂම සෞඛ්‍ය සේවාවක් ලබාදීමේ අරමුණින් මෙම විශේෂ නිරීක්ෂණය සිදුකළ බවය.
රෝහලේ සිදුකරන ලද නිරීක්ෂනයෙන් මෙන්ම විශේෂඥ වෛද්‍යවරුන්, වෛද්‍යවරුන්, ප්‍රමුඛ කාර්ය මණ්ඩලය සමග සිදුකළ සාකච්ඡාවේදී පලවූ අදහස් වලින් රෝහලේ සිදුකල යුතු කඩිනම් සංවර්ධනය පිළිබඳ තමන් අවබෝධයක් ලැබූ බවත් කඩිනමින් එම සංවර්ධන කටයුතු සිදු කිරීමට අවශ්‍ය පියවර ගන්නා ලෙසට තමන් මේ අවස්ථාවේදීම අදාළ නිලධාරීන්ට උපදෙස් ලබා දුන් බවද කීවේය.
එළැඹෙන වර්ෂයේදී අයවැය ප්‍රතිපාදන මත යාපනය ශික්ෂණ රෝහලේ ප්‍රතිකාර ඒකක හා ගොඩනැගිලි ඉදි කිරීම කටයුතු කරන බවත් ඒ සදහා රුපියල් මිලියන 500ක මුදලක් වෙන් කර ලබා දෙන බවද පැවසීය.
රෝගී සත්කාර සිදුකිරීම සදහා රෝහලට අවශ්‍ය මානව සම්පතද පුහුණුවීම් ලබා පිටවන කණ්ඩායම් වලින් හැකි පමනින් ලබා දීමට විෂයභාර නිලධාරීන් හට තමන් උපදෙස් ලබා දුන් බවද අමාත්‍යවරයා මෙහිදී වැඩිදුරටත් කීවේය.
මෙම අවස්ථාවට සෞඛ්‍ය අමාත්‍යංශයේ ලේකම් විශේෂඥ වෛද්‍ය පාලිත මහීපාල, සෞඛ්‍ය සේවා අධ්‍යක්ෂ ජනරාල් වෛද්‍ය අසේල ගුණවර්ධන, රෝහල් අධ්‍යක්ෂ වෛද්‍ය ටී. සත්‍යමුර්ති යන මහත්වරුන්ද විශේෂඥ වෛද්‍ය, වෛද්‍ය, හෙද ඇතුලු රෝහල් කාර්යමණ්ඩලය, මෙන්ම සෞඛ්‍ය සෞඛ්‍ය අමාත්‍යාංශයේ නිලධාරින් පිරිසක්ද, එක්ව සිටියහ.
