අමාත්‍යවරයා මෙම අදහස් පල කලේ ජයිකා ( JICA ) ආයතනයේ නියෝජිතයින් සමඟ ඊයේ(10) දින පෙරවරුවේ අමාත්‍යංශයේදි පැවති විශේෂ සාකච්චාවකදීය.
ජාත්‍යන්තර මූල්‍ය අරමුදල විසින් ක්‍රියාත්මක කරන ලද ණය ප්‍රතිව්‍යුහගතකරන ක්‍රියාවලියෙන් පසු රට තුල යලිත් ඇති වී තිබෙන ආර්ථික ස්ථාවරභාවය හේතුවෙන් ජයිකා ( JICA ) ආයතනය විසින් මෙම සහන ණය වැඩපිලිවෙල යලි ක්‍රියාත්මක කිරීමට එකඟතාව පල කර ඇති අතර මෙම කටයුතු සඳහා ජපන් රජයේ ප්‍රමුඛතාව ලබා දෙන බව ද අමාත්‍ය නිමල් සිරිපාල ද සිල්වා මහතා අවධාරණය කලේය.
ඒ අනුව සහන ණය වැඩ පිලිවෙල යටතේ ඉදිරි ඉදිකිරීම් කටයුතු සඳහා රුපියල් බිලියන 170 ක පමණ මුදලක් ජයිකා ( JICA ) ආයතනය විසින් ලබා දීමට තීරණය කර ඇති බවද අමාත්‍යවරයා පැවසීය.
නවීන තාක්ෂණය සහ පහසුකම් සහිතව ඉදිවන මෙම දෙවන පර්යන්තය ඉදිකිරීමෙන් අනතුරුව දැනට වසරකට මෙහෙයුම් කටයුතු සිදු කරනු ලබන මිලියන 06 ක් පමණ ගුවන් මඟීන් සංඛ්‍යාව මිලියන 16 ක් දක්වා වැඩි කිරීමට හැකියාව ලැබෙන බව ද අමාත්‍යවරයා මෙම සාකච්චාවේදී අවධාරණය කලේය.
මෙම සාකච්චාවේදී ගනු ලබන තීරණය අනුව අදාල ණය ගිවිසුම් කඩිනමින් අත්සන් කොට ඉදිකිරීම් කටයුතු සඳහා අදාල ටෙන්ඩර් කැඳවීම් සැප්තැම්බර් මාසය වන විට සිදු කිරීමට පියවර ගන්නා බව ජයිකා නියෝජිතයින් අමාත්‍යවරයාට පැවසීය.
මෙම සාකච්චාවට අමාත්‍යංශයේ ලේකම් කේ.ඩී.එස්. රුවන්චන්ද්‍ර, ජයිකා ( JICA ) ආයතනය නියෝජනය කරමින් ප්‍රධාන නියෝජිත යමාඩා ටෙට්සුයා( Yamada Tetsuya) ගුවන්තොටුපල සහ ගුවන්සේවා සමාගමේ සභාපති අතුල ගල්කැටිය, සිවිල් ගුවන්සේවා අධිකාරියේ අධ්‍යක්‍ෂ ජනරාල් සාගර කොටකදෙණිය යන මහත්වරුන් ඇතුලු නිලධාරීන් පිරිසක් සහභාගි විය.
