ඉන්දියානු ණය ආධාර යටතේ අනුරාධපුර දුම්රිය ස්ථානයේ සිට මිහින්තලය මංසන්ධිය දක්වා ඉදි කළ නව දුම්රිය මාර්ගයේ සමාරම්භක අවස්ථාවට එක්වෙමින් ප්‍රවාහන අමාත්‍යවරයා මේ බව පැවසීය. එමෙන්ම මින් ඉදිරියට සෑම පුන් පොහෝ දිනයකම අනුරාධපුරයේ සිට මිහින්තලය දක්වා දුම්රිය මඟින් බැතිමතුන් ප්‍රවාහනය නොමිලයේ සිදු කරනු ලබන බව ද අමාත්‍යවරයා වැඩිදුරටත් පැවසීය.ඉන්පසුව අනෙකුත් දිනවල දී මෙම දුම්රිය මාර්ගයේ ධාවනය කෙරෙන දුම්රිය පාසල් සිසුන් හා සරසවි සිසුන් ප්‍රවාහනයටත් ගොවි නිෂ්පාදන ප්‍රවාහනයටත් යොදා ගන්නා බව ද ප්‍රකාශ කළේය.
රණසිංහ ප්‍රේමදාස ජනාධිපතිවරයාගේ සමයේ ඉදිකර අත්හැර දමා තිබූ එම දුම්රිය මංතීරුව රුපියල් ලක්ෂ 6500ක වියදමින් පූර්ණ ප්‍රතිසංස්කරණයකට ලක් කර අනුරාධපුරයේ සිට මිහින්තලය වන්දනාමාන කරන්නට පැමිණෙන බැතිමතුන්ට ගමන් පහසුව ලබාදීම උදෙසා මෙසේ ඉදි කර තිබේ. මෙය මිහින්තලයේ සිට අනුරාධපුරය දක්වා උතුරු දුම්රිය මාර්ගයත්, නව දුම්රිය මාර්ගයත් ධාවන මංතීරු දෙකක් ලෙස ඉදි කර තිබේ. මෙම මාර්ගයට පාලම් දෙකක් ඇතුළත් වේ. මිහින්තලය දුම්රිය ස්ථානය, මිහින්තලේ හන්දිය උප දුම්රිය ස්ථානය, සමගිපුර සහ අශෝකපුර දුම්රිය නැවතුම්පොළ මෙම දුම්රිය මාර්ගයට ඇතුළත් වෙයි.
