ජාත්‍යන්තර මූල්‍ය අරමුදල සමඟ වන එකඟතා අනුව රටේ ආර්ථිකය ස්ථාවරව පවත්වාගෙන යාම වෙනුවෙන් සපුරාගත යුතු ආර්ථික ඉලක්ක ගණනාවක් පවතින බවද පෙන්වාදුන් ජනාධිපතිවරයා එම ඉලක්ක කඩ කිරීම යනු රටේ ආර්ථිකය විනාශ කිරීමක් වන බැවින් දේශපාලන අරමුණු වෙනුවෙන් වේදිකාවල ප්‍රකාශ සිදු නොකර පවතින රාමුව තුළ පමණක් කතා කිරීම විපක්ෂයේ වගකීම වන බවද සඳහන් කළේය.
විපක්ෂය, විපක්ෂයේ සිටින්නේ රට වෙනුවෙන් එදා වගකීම් භාර නොගෙන සාම්ප්‍රදායික දේශපාලනයේ නිරතවූ නිසා බව පැවසූ ජනාධිපතිවරයා එදා නොබියව අභියෝගය භාරගත් ආණ්ඩුව අද එහි සාර්ථක ප්‍රතිඵල පෙන්වා ඇති බවත් එබැවින් රට වෙනුවෙන් එක් මාර්ගයක ගමන් කරමු යැයි තමා සියලුදෙනාගෙන් ඉල්ලා සිටින බවත් සඳහන් කළේය.
ජනාධිපති රනිල් වික්‍රමසිංහ මහතා මේ බව සඳහන් කර සිටියේ කරවනැල්ල, වැන්දල ශ්‍රී විසුද්දාරාම විහාරස්ථානයේ අද (04) පැවති “උරුමය” සින්නක්කර ඔප්පු ලබාදීම හා අඩු ආදායම්ලාභීන්ට සහල් බෙදාදීමේ වැඩසටහනට එක්වෙමිනි.
“උරුමය” සින්නක්කර ඔප්පු ප්‍රදානය කිරීමේ ජාතික වැඩසටහනට සමගාමීව කෑගල්ල දිස්ත්‍රික්කයේ සින්නක්කර ඔප්පු 350ක් ප්‍රදානය කිරීම මෙහිදී ජනාධිපති රනිල් වික්‍රමසිංහ මහතා අතින් සිදු විය.
අඩු ආදායම්ලාභී පවුල් සඳහා සහල් කිලෝ 20ක් ලබාදීමේ වැඩසටහනේ දෙවන අදියර ලෙස සහල් කිලෝ 10 බැගින් පවුල් 800ක් සඳහා ලබාදීමද ජනාධිපතිවරයා අතින් අද සිදු කෙරිණි.
මෙහිදී අදහස් දැක්වූ ජනාධිපති රනිල් වික්‍රමසිංහ මහතා මෙසේද පැවසීය,
මෙම උරුමය සින්නක්කර ඔප්පු හිමිවීම ඔබේ අයිතිය ලබාදීමක් ලෙස මම සලකනවා. ජනතාවට මෙම අයිතිය ලබාදීමට මෙතෙක් පැවති සියලු ආණ්ඩු අපොහොසත් වුණා. ඒ වෙනුවෙන් නිසි ක්‍රමවේදයක් ද ක්‍රියාත්මක වූණේ නැහැ. නමුත් අපි ආණඩුවක් ලෙස එම වැඩකටයුත්ත සිදු කර තිබෙන අතර සුදු ජාතිකයින් මෙරට ජනතාවගේ ඉඩම් අත්පත් කරගත් නීතියෙන්ම රටේ ජනතාවට යළි එම ඉඩම් අයිතිය ලබාදී තිබෙනවා. දැන් එම ඉඩම ආරක්ෂා කර ගැනීම ඔබේ වගකීමක් වෙනවා.
මේ ආණ්ඩුව සමාන්‍ය ආණඩුවක් නොවෙයි. මෙය එක් පක්ෂයකින් නිර්මාණය වු ආණ්ඩුවක් නොවෙයි. සෑම පක්ෂයකම නියෝජිතයන් මේ ආණඩුවේ සිටිනවා. ඒ වගේම සෑම පක්ෂයකම කණ්ඩායම් විපක්ෂයේද සිටිනවා. ඒ නිසා ආණ්ඩු පක්ෂය වගේම විපක්ෂයත් සර්වපාක්ෂිකයි.
නමුත් ආණ්ඩුවක් ලෙස අද අප විශාල වගකීමක් භාරගෙන තිබෙනවා. විපක්ෂය කියන්නේ එම වගකීම භාර ගැනීම ප්‍රතික්ෂේප කළ කණ්ඩායමයි. ආණ්ඩුවේ සහ විපක්ෂයේ තිබෙන වෙනස එයයි. එදා රටේ තිබූ තත්ත්වය මම අමුතුවෙන් ප්‍රකාශ කළයුතු නැහැ. නමුත් අද අපි මේ රට ආර්ථික වශයෙන් ඉදිරියට ගෙනැවිත් තිබෙනවා. මෙම තත්ත්වයෙන් ගොඩ ඒමට අපට වසර 04ක් 05ක් ගතවනු ඇතැයි බොහෝ දෙනෙක් සිතුවා. නමුත් වසර දෙකකින් අපට ගොඩ ඒමට හැකි වූ අතර එහිදී අසීරු තීන්දු තීරණ ගැනීමට ද සිදු වුණා.
අද රටේ සංචාරක ව්‍යාපාරය ඉදිරියට පැමිණ තිබෙනවා. දැන් අප රටේ බහුමාන දිළිදුකම අඩු කර ගැනීම වෙනුවෙන් අවධානය යොමු කර තිබෙන අතර ඒ වෙනුවෙන් කෘෂි නවීකරණ වැඩසටහන ක්‍රියාත්මක කර තිබෙනවා. මේ රටේ 80%ක් පවතින්නේ ග්‍රාමීය ආර්ථිකයයි. ග්‍රාමීය ආර්ථිකය නගා සිටුවන්නේ නැතිව දුප්පත්කම නැති කරන්න බැහැ.
ඒ වගේම රටේ ආර්ථිකය දියුණු කිරීම වෙනුවෙන් වන ඉලක්ක පිළිබඳ ජාත්‍යන්තර මූල්‍ය අරමුදල සමඟ අප එකඟතා ඇති කරගෙන තිබෙනවා. 2027 වන විට මෙරට ආර්ථිකය 5%ක් දක්වා වර්ධනය කර ගැනීමට තිබෙනවා. එය ඉදිරියේදී 8%ක් දක්වා වර්ධනය කරගත යුතුයි. විරැකියාව 2025 වන විට 5%දක්වා අඩුකරගත යුතුයි. ඒ වගේම බහුමාන්‍ය දිළිදුකම 2027 වන විට 25% ක් -15%ක් දක්වා අඩු කර ගැනීමත් 2035 වන විට එය 10%කට අඩු කර ගැනීමේ ඉලක්ක අපට තිබෙනවා.
අප මේ වැඩකටයුතු කරන බව ප්‍රකාශ කළ නිසා රටේ ආර්ථිකය ගොඩගැනීම වෙනුවෙන් ජාත්‍යන්තර මූල්‍ය අරමුදල අපට සම්පූර්ණ සහාය ලබා දී තිබෙනවා. ඒ වගේම අප ලබාගත් විදේශ ණය ආපසු ගෙවීම ලිහිල් කිරීමට කටයුතු කරමින් සිටිනවා. මෙම වැඩපිළිවෙළ කඩ කළහොත් අප නැවත රටක් ලෙස පසුපසට යනවා. ජාත්‍යන්තර මූල්‍ය අරමුදලේ සහාය අපට අහිමි වෙනවා. මොකද ලංකාව අවස්ථා ගණනාවකදී ජාත්‍යන්තර මුල්‍ය අරමුදල වෙත මෙම පොරොන්දු ලබාදී ඒවා කඩ කළා.
ඒ නිසා මේ සියලු එකඟතාවන් ඇතුළත් කර ආර්ථික පරිවර්තන පනත් කෙටුම්පත පාර්ලිමේන්තුවට ඉදිරිපත් කර තිබෙනවා. මෙම කෙටුම්පත මඟින් අපේ ආර්ථික ඉලක්ක සහ එකඟතාවන් නීතිගත කර තිබෙනවා. ශ්‍රී ලංකාව මෙම වැඩපිළිවෙළ සමඟ ඉදිරියට යන බවට, අපට ණය ලබාදුන් රටවල් සෑහීමකට පත්ව සිටින නිසා ඔවුන්ගේ සහාය අපට හිමි වෙනවා.
ඒ නිසා අපට මෙය වෙනස් කරන්න බැහැ. දැන් මෙම සාකච්ඡා අවසන් අදියරේ පවතිනවා. ඒ නිසා දේශපාලන වේදිකාවේ ඕපා දූප කථා කර වැඩක් නැහැ. තමන් කරන කියන දෙයක් මෙම රාමුව තුළ සිදු කළ යුතුයි. ඒ නිසා මම විපක්ෂයට කියනවා ඔබ විපක්ෂයට ගියේ වගකීම් භාර ගැනීමට නොහැකි වු නිසයි. සාම්ප්‍රදායික දේශපාලනය කළ නිසයි. අද අප ආණ්ඩුවේ සිටින්නේ බිය නැතිව අභියෝග භාරගෙන කටුයතු කළ නිසයි. දැන් අප ප්‍රතිඵල පෙන්වා තිබෙන නිසා අපි සියලුදෙනා එක්ව එක මාර්ගයක ගමන් කරමු කියා මා සියලුදෙනාගෙන් ඉල්ලා සිටිනවා.
සබරගමුව පළාත් ආණ්ඩුකාර අධිනීතීඥ නවීන් දිසානායක මහතා,
ජනතාවට සින්නක්කර ඉඩම් අයිතිය ලබාදීමේ මෙම වැඩපිළිවෙළ ජනාධිපතිතුමා අග්‍රමාත්‍යවරයා ලෙස සිටි සමයේ සිටම ආරම්භ කළ වැඩපිළිවෙළක් බව කිවයුතුයි. නමුත් එම කාලවකවානුවේදී විවිධ බාධා පැමිණියා. ජනාධිපති රනිල් වික්‍රමසිංහ මහතාගේ දේශපාලන ගමන් මඟ දෙස බැලූ විට එතුමා දැරූ සියලු අමාත්‍ය ධූරවලදි ජනතාවට විශාල සේවයක් කර තිබෙනවා. අධ්‍යාපන ඇමතිවරයා ලෙසත්, තරුණ කටයුතු ඇමතිවරයා ලෙසත් මේ රටේ දරුවන්ට මෙන්ම තරුණයන් වෙනුවෙන් එතුමා ඉටු කර තිබෙන සේවය ප්‍රසංශනීයයි. එතුමා අද ජනාධිපතිවරයා ලෙස ඔබට සින්නක්කර ඉඩම් ඔප්පු ලබාදීමේ වැඩසටහන ක්‍රියාත්මක කර තිබෙනවා.
මාගේ පියාගේ කාලයේ ලබා දී තිබූ ඉඩම් බලපත්‍රද මෙම උරුමය වැඩසටහන මගින් සින්නක්කර ඔප්පු බවට පත්කළ හැකියි. සිංගප්පූරුව වැනි රටවල මෙවැනි සින්නක්කර ඔප්පු ලබාදීම තුළින් ජනතාව විශාල දියුණුවක් ලබා තිබෙනවා. ඒ වගේම අද ඔබට ලබා දෙන මෙම ඔප්පු මගින් රටේ ආර්ථිකයටත් ඔබගේ ආර්ථිකයටත් විශාල ධනාත්මක වාසියක් සිදු වෙනවා.
මුදල් රාජ්‍ය අමාත්‍ය ආචාර්ය රංජිත් සියඹලාපිටිය මහතා,
ජනාධිපතිවරයා ලෙස රනිල් වික්‍රමසිංහ මහතා පසුගිය වසර දෙකක කාලය තුළ නිහඬ විප්ලවයක් සිදු කළා. දිළිඳු ජනතාවගේ ප්‍රශ්නවලට උත්තර සෙවීමට කටයුතු කළ එකම රාජ්‍ය නායකයා රනිල් වික්‍රමසිංහ මහතා යි. මීට වසර දෙකකට පෙර තිබුණු ආර්ථික අර්බුදයෙන් රට ගොඩගෙන සියලුදෙනාට ජීවත් විය හැකි පරිසරයක් නිර්මාණය කිරීමට ජනාධිපතිවරයා කටයුතු කළා.
ඒ වගේම ජනාධිපතිතුමා සින්නක්කර ඉඩම් ඔප්පු ලබාදීමට අද කටයුතු කරනවා. අඩු ආදායම්ලාභී පවුල් සඳහා සහල් ලබාදීමත් සිදු කරනවා. මේ රටේ දිළිදු ජනතාව වෙනුවෙන් ජනාධිපතිවරයා නිරන්තරයෙන් තීන්දු තීරණ ගත්තා. සැබෑවට උපකාර අවශ්‍ය ජනතාව වෙනුවෙන් ජනාධිපතිවරයා හැමදාම පෙනී සිටියා. වතු සේවකයාට දිනක වැටුප රුපියල් 1700ක් ලබා දුන්නා. ජනාධිපතිවරයා සිදුකළේ ඝෝෂාකාරී විප්ලවයක් නොවෙයි. එම නිසා එතුමා සිදු කළ ඒ නිහඬ විප්ලවය ජනතාව ඇගයීමට ලක් කළ යුතුයි.
විදේශ කටයුතු රාජ්‍ය අමාත්‍ය තාරක බාලසූරිය මහතා,
දුප්පත් ජනතාවට ප්‍රාග්ධනය ලබාදීමක් මෙමඟින් සිදු වෙනවා. වතු සමාගම්වලට ඉඩම් ලබාදීම තුළින් යටත් විජිත සමයේ මෙරට ජනතාවගේ ඉඩම් අහිමි වුණා. අද මේ ඉඩම් සින්නක්කරව ලබාදීම තුළින් මෙරට ආර්ථිකයට සෘජු දායකත්වයක් ඒ හරහා ලබා ගත හැකියි. විශේෂයෙන්ම කෑගල්ල දිස්ත්‍රික්කයේ ජනතාවගේ ඉඩම් තේ, රබර්, කරාබු නැටි සඳහා වගාවට යෙදාගත හැකියි. මේ වගා ඉඩම් තුළින් ආර්ථිකයට විශාල දායකත්වයක් සැපයිය හැකියි. “උරුමය” වැඩසටහන මගින් ජනතාවගේ ඉඩම් අයිතිය සුරකීම සිදුවෙනවා.
තාක්ෂණ රාජ්‍ය අමාත්‍ය කනක හේරත් මහතා,
මේ පළාතේ සිටින ජනතාවගේ බහුතරයකට සින්නක්කර ඉඩම් ඔප්පු තිබුණේ නෑ. එම ජනතාවට මේ ආකාරයට ඉඩම් අයිතිය ලබාදීම විශාල පුණ්‍යකර්මයක් වෙනවා. උරුමය වැඩසටහන සමඟ ග්‍රාම නිලධාරීන්ට විශාල වැඩකොටසක් පැවරී තිබෙනවා. ඒ නිසා ග්‍රාම නිලධාරීන් වෙනුවෙන් වන විද්‍යුත් පනත සඳහා අප හෙට දිනයේ රෙගුලාසි ලබා දෙනවා. ඒ අනුව ඉදිරියේදී ග්‍රාමනිලධාරීන්ට ඔන්ලයින් ක්‍රමයට සහතික නිකුත් කිරීමට හැකි පරිසරයක් නිර්මාණය වෙනවා . මීට වසර දෙකකට පෙර තිබුණ රට ආර්ථිකය වශයෙන් ඉදිරියට ගෙනවිත් නව තාක්ෂණය මෙරටට හඳුන්වාදීමට කටයුතු කළේ ජනාධිපති රනිල් වික්‍රමසිංහ මහතායි. ඒ නිසා ඉදිරියේදී මැතිවරණවලදී තීන්දු තිරණ ගැනීමේදී පසුගිය වසර දෙක පිළිබඳ සිතා කටයුතු කරන්න කියා මා ජනතාවගෙන් ඉල්ලා සිටිනවා.
පාර්ලිමේන්තු මන්ත්‍රීවරුන් වන රාජිකා වික්‍රමසිංහ, උදයකාන්ත ගුණතිලක, සුදත් මංජුල , හිටපු රාජ්‍ය අමාත්‍ය චම්පිකා ප්‍රේමදාස, ආර්ථික කටයුතු පිළිබඳ ජනාධිපති ජ්‍යෙෂ්ඨ උපදේශක ආචාර්ය ආර්. එච්.එස්.සමරතුංග යන මහත්ම මහත්මීහු ඇතුළු පිරිසක් මෙම අවස්ථාවට එක්ව සිටියහ.
