ඒ් අනුව ඉහත තනතුරු සඳහා බඳවා ගැනීමේ සම්මුඛ පරීක්ෂණ සඳහා විභාග දෙපාර්තමේන්තුව විසින් පැවැත්වූ විභාගය සමත් , ඉහළම ලකුණු ලබාගත් අයගේ නාම ලේඛනය, ලකුණු අනුපිළිවෙළ අනුව නොව ආකාරාදී පිළිවෙළ අනුව රේගුව වෙත පළමුව යොමු කරන බව අමාත්‍යවරයා සඳහන් කළේය.
ඒ් අනුව පැවත්වෙන සම්මුඛ පරීක්ෂණ වලදී සම්මුඛ පරීක්ෂණ මණ්ඩලය ඉදිරියේදීම උස සහ පපුව මැන බැලීම සිදු කරන බව අමාත්‍යවරයා මෙහිදී පෙන්වා දෙනු ලැබීය. පසුව සහතික පරීක්ෂා කර බැලීම සිදුවන බවත් , චක්‍රලේඛයේ පැහැදිළිව සඳහන් කර ඇති ආකාරයට ක්‍රීඩා කෞෂල්‍ය සඳහා ද එහිදී ලකුණු හිමි වන බවත් අමාත්‍යවරයා පැවසීය.
එම සම්මුඛ පරීක්ෂණයේදී ලබාගන්නා ලකුණු නැවත විභාග දෙපාර්තමේන්තුවට යැවීමෙන් පසු එම ලකුණු ප්‍රමාණය සහ විභාගයේදී ලබාගත් ලකුණු ප්‍රමාණය එකතු කොට එය දෙකට බෙදා ලැබෙන ලකුණු ප්‍රමාණය අනුව සැකසෙන ප්‍රමුඛතා ලේඛනය සකසා බඳවා ගැනීම් සඳහා එය රේගු දෙපාර්තමේන්තුව වෙත එවන බව අමාත්‍යවරයා සඳහන් කළේය.
ඒ් අනුව මේ රටට වැඩිම ආදායම් සොයන ආයතනයට ඇතුළත් වීමට රටේ උගත් තරුණ දූ පුතුන්ට අවස්ථාව සලසා දී ඇති බවත් , විනිවිද භාවයෙන් යුත් ආදර්ශමත් බඳවා ගැනීමක් සිදුකරන බැවින් මීට අදාළ ගැසට් පත්‍රයේ සඳහන් ආකාරයට පිටින් කිසිවක් සිදු නොවන බවත් තමා වගකීමෙන් ප්‍රකාශ කරන බව අමාත්‍යවරයා මෙහිදී වැඩිදුරටත් පැවසීය.
