අලි මිනිස් ගැටුම විසඳීම සඳහා කෙටිකාලීන හා දිගුකාලීන වැඩසටහන් ක්‍රියාත්මක කළ යුතු බවත් ඒ සඳහා වනජීවී හා වන සංරක්ෂණ දෙපාර්තමේන්තුව කඩිනමින් කටයුතු කළයුතු බවටත් අමාත්යවරිය එහිද‍ි වනජීවී අධ්‍යක්ෂක ජනරාල්වරයා ඇතුලු නිලධාරීන්ට උපදෙස් ලබාදී ඇත.
දීර්ඝ කාලයක සිට වන සංරක්ෂිත ප්‍රදේශ තුළ ගොවිතැන් කටයුතු සිදු කරන , පාරමිපරික කර්මාන්තයන්හි නියැලෙන හා ජීවත්වන පුද්ගලයන්ගේ ගැටලු විසඳීම සඳහා ඔවුන්ගේ ඉඩම් හිමිකම් පිළිබඳ තොරතුරු කඩිනමින් අන්තර් අමාත්‍යංශ අනුකමිටුව වෙත දිස්ත්‍රික් ලේකම් මගින් යොමු කිරීමට අවශ්‍ය කටයුතු සිදු කරන ලෙසද අමාත්යවරිය ප්‍රාදේශීය ලේකම්වරුන්ට එහිද‍ි උපදෙස් දී තිබේ.
ජනගහනය වැඩිවීමත් , අලි ගහනය වැඩිවීමත් සීමිත භූමියක් ඇති ලංකාව වැනි රටකට බරපතළ අභියෝගයක් බව තේරුම් ගෙන කටයුතු කළ යුතු බවද එහිදී අමාත්යවරිය අවධාරණය කළාය.
මෙම අවස්ථාවට පොළොන්නරුව දිස්ත්‍රික් සම්බන්ධීකරණ කමිටු සභාපති පාර්ලිමේන්තු මන්ත්‍රී ජගත් සමරවික්‍රම මහතා, වනජීවී හා වන සම්පත් සංරක්ෂණ අමාත්‍යාංශයේ ලේකම් චන්ද්‍රා හේරත් මහත්මිය , පොළොන්නරුව දිස්ත්‍රික් ලේකම් ඩබ්ලිව් .ඒ. ධර්මසිරි මහතා ඇතුලු දෙපාර්තමේන්තු හා ආයතන ප්‍රධානීන් , ගොවි සංවිධාන නියෝජිතයන් ඇතුලු ප්‍රාදේශීය ජනතා නියෝජිතයන් පිරිසක් ද සහභාගි විය.
