පීටර් ටක්සෝයි ජෙන්සන් (Peter Taksoe-Jensen) මහතා ශ්‍රී ලංකාව, ඉන්දියාව, භූතානය සහ මාලදිවයින යන රටවල් හතරෙහිම ඩෙන්මාර්ක් තානාපති වශයෙන් කටයුතු කරයි.
ඒ මහතා ශ්‍රී ලංකාවට පැමිණියේ ඊයේ කොළඹදී පැවැත්වුණු එක්සත් ජාතීන්ගේ සංවර්ධන වැඩසටහන් සමුළුවට(UNDP Conference) සහභාගීවීම සඳහාය. වරාය සහ නාවික අමාත්‍යාංශයට පැමිණි ඩෙන්මාර්ක් තානාපතිතුමා පිළිගත් වරාය අමාත්‍ය අර්ජුන රණතුංග මහතා ඔහු සමඟ දීර්ඝ සාකච්ඡාවකද නිරත විය.
ශ්‍රී ලංකා වරාය ක්ෂේත්‍රයෙහි ආයෝජන අවස්ථා කවරේදැයි මෙම සාකච්ඡාවේදී පීටර් ටක්සෝයි ජෙන්සන් මහතා විසින් සොයා බැලිණ. දෙරට අතර පවත්නාවූ නාවික වෙළඳ සහයෝගීතාව වැඩි දියුණු කිරීම ගැනද මෙම හමුවේදී අවධානය යොමු විය.
