විදුලිබල හා පුනර්ජනනිය බලශක්ති අමාත්‍ය රංජිත් සියඹලාපිටිය මහතා පසුගියදා හමු වූ ඉරාන ඉස්ලාමීය ජනරජයේ බලශක්ති අමාත්‍යවරයා දෙරට අතර පවතින්නාවූ ද්විපාර්ශ්වීය සබඳතා තවත් තහවුරු කරගැනීමේ පියවරක් වශයෙන් ඉරානය තුළ යොදාගනු ලබන පුනර්ජනනීය බලශක්ති ක‍්‍රමෝපායන් පිළිබඳව ශ‍්‍රී ලංකාවේ බලශක්ති ක්ෂේත‍්‍රයද දැනුවත් කරන බව ද පැවසීය.
ඉරාන අමාත්‍යවරයා ප්‍රකාශ කළේ එම ක‍්‍රමෝපායයන් මෙරටේ අනුගමනය කිරීමට අවශ්‍ය සහාය සපයන බවයි.
ඉරාන රාජ්‍යය තුළ මේ වනවිට ස්වභාවික ගෑස් මෙන්ම සුළං යන ප‍්‍රභවයන් යොදා ගනිමින් බලශක්ති උත්පාදනය කරනු ලබන බව පැවසූ අමාත්‍යවරයා, මේ වනවිට ලංකාව තුළ ලැබෙමින් පවතින්නාවූ ගෑස් සම්පත වැඩිවශයෙන් යොදා ගනිමින් බලශක්තිය උත්පාදනය කෙරෙහි යොමුවීම ආර්ථික වශයෙන් වැදගත් වියහැකි බව පෙන්වා දුන්නේය.
වසර 2017 වනවිට ශ‍්‍රී ලංකාවේ බලශක්තියෙන් සැලකියයුතු ප‍්‍රමාණයක් පුනර්ජනනීය බලශක්ති ක්ෂේත‍්‍රයේ දායකත්වයෙන් ලබාගැනීමට මේ වනවිට සැලසුම් සකස්කර තිබෙන බව, ලාංකීය බලශක්ති ක්ෂේත‍්‍රයේ ඉදිරි සැලසුම් විස්තර කරමින් අමාත්‍ය රංජිත් සියඹලාපිටිය මහතා පෙන්වා දුන්නේය.
එසේම බලශක්ති අර්බුදයට පිළියම් සොයනු වස්, දේශීය වශයෙන් අනුගමනය කරන්නාවූ බලශක්ති සංරක්ෂණ ක‍්‍රමෝපායයන් පිළිබඳව ඉරාන අමාත්‍යවරයා විෂයබාර අමාත්‍යවරයා සමග දීර්ඝ වශයෙන් සාකච්ඡාවට ලක් විය.
මෙම කරුණු වලට අමතරව දෙරට අතර මිත‍්‍රත්වය තහවුරු කරගැනීම පිළිබඳවද අමාත්‍යවරයා සමඟ වැඩිදුර කරුණු සාකච්ඡා කළ ඉරාන අමාත්‍යවරයා, මෙරටේ පුනර්ජනනීය බලශක්ති ව්‍යාප්තියට සිය රට වෙතින් ලබාදිය හැකි උපරිම සහයෝගය ලබාදීමට තමා පොරොන්දු විය.
