ජර්මනියේ බර්ලින් නුවරදී කෘෂිකර්ම අමාත්‍ය දුමින්ද දිසානායක මහතා ජර්මානු ආහාර හා කෘෂිකර්ම අමාත්‍ය Christian Schmid සමඟ විශේෂ සාකච්ඡාවක නිරත් වී තිබේ. ආහාර හා කෘෂිකර්මය පිළිබඳව ගෝලීය සමුළුවට කෘෂිකර්ම අමාත්‍ය දුමින්ද දිසානායක මහතා සහභාගී වූ අතර එහිදී මෙම හමුව සිදුව ඇත.
ජර්මනියේ බර්ලින් නුවර පැවති මෙම සමුළුවට විවිධ රටවල් නියෝජනය කර ගනිමින් කාෂිකර්ම අමාත්‍යවරු 65 ක් පමණ සහභාගී වී තිබේ.
මෙහිදී විශේෂ අවධානය යොමු වූයේ ශ්‍රී ලංකාවේ අර්තාපල් බීජ නිෂ්පාදනය වැඩි දියුණු කිරීම සම්බන්ධයෙනි.
විශේෂයෙන් ලංකාවේ අර්තාපල් බීජ නිෂ්පාදනය සංවර්ධනය කිරීම, කුඩා ගොවිපල් හිමියන් සඳහා යන්ත්‍රෝපකරණ භාවිතය හඳුන්වා දීම, එළවළු පළතුරු බීජ සැකසීමේ පහසුකම් සහ ගබඩා කිරීම, එළවළු පළතුරුල කුළුබඩු සහ ධාන්‍ය අපනයනය කිරීම ආදී අංශ පිළිබඳව මෙහිදී අවධානය යොමු විය.
ශ්‍රී ලංකාව ආසියා - පැසිෆික් ව්‍යාපාරික සංගමයට සම්බන්ධ කර ගනිමින් තවදුරටත් අපේ රට සමඟ ආර්ථික සබඳතා ඇති කර ගැනීමට හැකි වනු ඇත. ජනතාව වෙනුවෙන් සෞඛ්‍ය සම්පන්න ආහාර ලබා දීමට මෙම ද්විපාර්ශවික සබඳතා වඩාත් ශක්තිමත්ව ඉදිරියට ගෙන යාමට දෙරටේ අමාත්‍යවරු මෙහිදී එකඟතාවය පළකර තිබේ.
