ආචාර්ය ලෙස්ටර් ජේම්ස් පිරීස්ගේ පළමු සිනමා නිර්මාණය වන රේඛාව චිත්‍රපටය මහජන ප්‍රදර්ශනය ආරම්භ කර 2016 වසරට වසර 60ක් සපිරීම විශේෂී සිදුවීමකි.
මෙම සිසුශේෂී සිද්ධීන් තේමා කරගනිමින් ශ්‍රී ලංකා ජාතික චිත්‍රපට සංස්ථාව වැඩසටහන් පෙලක් ක්‍රියාත්මක කිරීමට කටයුතු සම්පාදනය කර තිබේ.
ඒ අනුව ජනවාරි 21 පෙරවරු 09.00ට ශ්‍රී ලංකා චිත්‍රපට සංස්ථාවේ දී පුෂ්පජිත් නිරෝෂන් ජයසිංහ මහතා විසින් සම්පාදනය කරන ලද ජලයෙන් යට වූ ලින්චිගේ ලෝකය ග්‍රන්ථය එළි දැක්වීම, ජාතික චිත්‍රපට සංස්ථාවේ නිර්මාතෘ සිරිමාවෝ බණ්ඩාරණායක මැතිණියට උපහාර ප්‍රදානය කිරීම සහ පස්වරු 9.00ට සිනමා ක්ෂේත්‍රයේ සියලු දෙනාට සුබපතා සර්ව රාත්‍රික පරිත්‍රාණ දේශනාවක් පාර්ලිමේන්තු ප්‍රතිසංස්කරණ හා ජනමාධ්‍ය අමාත්‍ය ගයන්ත කරුණාතිලක මහතාගේ හා චිත්‍රපට සංස්ථාවේ සභාපති නීතීඥ දීපාල් චන්ද්‍රරත්න මහතාගේ ප්‍රධානත්වයෙන් පැවැත්වේ.
මෙම ප්‍රධාන උත්සවයට සමගාමීව
* ජනවාරී 17 සිට 20 දක්වා ශ්‍රී ලංකා ජාතික චිත්‍රපට සංස්ථා සිනමා ශාලාවේ දී 'මි.මී. 35 පොල්කිච් වර්ණ චිත්‍රපට දැක්ම'
ජනවාරී 17 පස්වරු 3.30 ට සිකුරු ලියා, 6.30 ට හතර දෙනාම සූරයෝ
ජනවාරී 18 පස්වරු 3.30 ට සාරවිට, 6.30 ට රේඛාව
ජනවාරී 19 පස්වරු 3.30 ට වල්මත් වූවෝ, 6.30 ට තුෂාරා
ජනවාරී 20 පස්වරු 3.30 ට අල්ලපු ගෙදර
යන චිත්‍රපට මෙහි දී ප්‍රදර්ශනය කිරීමට නියමිතය.
* ජනවාරී 19 ශ්‍රී ලංකා ජාතික චිත්‍රපට සංස්ථාවේ දී පවත්වන සිනමා රසවින්දන වැඩමුළුව
තරුණ පරපුර සිනමාව කෙරෙහි වැඩි නැඹුරුවක් ඇති කිරීම හා සිනමා විඥානය වර්ධනය කිරීම අරමුණු කරමින් කොළඹ ප්‍රධාන පාසැල් කිහිපයක සිසු දරුවන් හා විශ්වවිද්‍යාල සිසුන් සහභාගී වන මෙම සිනමා රසවින්දන වැඩමුළුව සඳහා ප්‍රවීණ විශ්වවිද්‍යාල ආචාර්ය මඩුල්ලක් හා සිනමා ක්ෂේත්‍රයේ ප්‍රවීණයන් විසින් සම්පත් දායකත්වය ලබාදීමට නියමිතය.
