දෙමව්පියන් අතර පවතින ආරවුල්, බේබදුකම්, දෙමව්පියන් අතර තිබෙන නොගැළපීම්, අඬදබර කුඩා දරුවන් හොඳින් නිරීක්ෂණය කරන බවත් දරුවන් ඒ තුළින් සමාජය කියැවීමට පුරුදු වන්නේ යැයි ද ඛනිජතෙල් කර්මාන්ත අමාත්‍යවරයා පැවසීය. දෙමව්පියන් අතර පවතින ආරවුල්, බේබදුකම් නිසා වන ආරවුල්, දෙමව්පියන් අතර තිබෙන නොගැළපීම් නිසා ඇතිවන සිදුවීම් මාධ්‍ය මඟින් රසකර වාර්තා කරන බවත් අමාත්‍යවරයා සඳහන් කළේය.
රුපියල් ලක්ෂ විසිපහක වියදමින් ඉදිකිරීමට යෝජිත කටුගම්පොළ තලම්මැහැර ශ්රී සුනන්දාරාම පෙරපාසල ඉදිකිරීම සඳහා මුල්ගල් තැබීමේ උළෙළේ දී අමාත්‍යතුමා මේ අදහස් පළ කළේය.
වැඩිදුරටත් අදහස් දැක්වූ අමාත්‍යවරයා මෙසේ ද කීය. "හොඳ සුදු ඇඳුමකින් සූදානම් වී සපත්තු දෙකක් පැළඳ නගරයේ පාසලට තම දරුවන් යැවීම සෑම දෙමව්පියකුගේ ම සිහිනයකි. ළමා කාලය හරි වැදගත් කාලපරිච්ඡේදයක්. එම කාලය තුළ දරුවා තුළ ගොඩනැගෙන පෞරුෂත්වය, ඔහුගේ අනාගතය තීරණය කරනු ඇත. රටේ අනාගතය ද තීරණය කරයි. මේ නිසා ළමා සංවර්ධනය වෙනුවෙන් අපගේ කාර්යභාරය නිසි ලෙස ඉටු කිරීමට වගබලා ගත යුතුයි.
බිරිඳ සමඟ උරණ වූ විට දරුවන්ගෙන් පළිගන්නා සමාජයක් නිර්මාණය වීමටත් දෙමාපියන් තමාට අඩුවෙන් සලකන බවත් අනෙකාට වැඩිපුර සලකන බවත් සිතා අනෙකා ඝාතනය කරන සමාජයක් නිර්මාණය වීමටත් පූර්ව ළමාවිය සංවර්ධනය බලපායි. දෙවන ලෝක යුද්ධයට ජර්මනිය රැගෙන ගිය හිට්ලර්ගේ චරිතාපදානයට අනුව ඔහුගේ පියා දරදඬු පුද්ගලකු වන අතර සිය මව සහ පුංචි හිට්ලර්ව අමානුෂික වද බන්ධනවලට ලක් කර ඇත. ඒ නිසා හිට්ලර් ද දරදඬු පුද්ගලයකු වූ බව පෙන්වා දී තිබේ. අවසානයේ දී හිට්ලර් යුදෙව්වන් ලක්ෂ ගණනක් මරා දැමීමට කටයුතු කළා. ලොව පුරා ජනතාව විශාල පිරිසක් මිය ගියා. ජෝසප් ස්ටාලිං ද දරදඬු පුද්ගලයෙකු වුණේ පූර්ව ළමාවිය සුන්දර නො වූ බේබදු පියෙකුගෙන් ඉතා අමානුෂික ලෙස වද බන්ධනයට ලක් වූ ළමා කාලයක් ගත කළ නිසා බව දැක්වෙනවා. පුවත්පත් කියවීමේ දී පෙනෙන කාරණයක් තමයි ලංකාවේ සිර ගෙවල්වල සිටින අය ළමා කාලය ගත කර ඇත්තේ මේ ආකාරයේ පරිසරයක බව. පවුලේ පසුබිම දරුවාගේ මනසේ තැන්පත් වූ විට දරුවන් පාසල තුළ දී සමාජානුයෝනය කළ නොහැකියි.
මේ නිසා පූර්ව ආචාර්යවරයා වශයෙන් දෙමාපියන් ඒ සඳහා විශේෂයෙන් වගකිව යුතුයි. මේ නිසා තමාගේ දරුවා රටට වැඩදායක කෙනෙක් කරනවා ද? දඩබ්බරයෙකු කරනවා ද? කියා දෙමාපියන් තීරණය කළ යුතුයි. ඒ අනුව සිතා දෙමාපියන්ගේ හැසිරීය යුතු බවත්" අමාත්‍යතුමා තවදුරටත් පෙන්වා දුන්නේය.
NDH
