පෝෂණය පිළිබදවත්, ශරීර සෞඛ්‍යයට හිතකර ආහාර රටාවන් සම්බන්ධවත් ප්‍රජාව දැනුවත් කිරීමේ අවශ්‍යතාවයක් මතුව ඇතැයිද ඒ මහතා පැවැසීය.
මහනුවර දිස්ත්‍රික් පෝෂණ කමිටුව පිහිටුවීමේ රැස්වීමේදී දිස්ත්‍රික් ලේකම්වරයා මෙම අදහස් පලකළේ ය. පෝෂණය පිළිබද බහු ආංශික සැලැස්ම ක්‍රියාවට නැංවීම සදහා වු මහනුවර දිස්ත්‍රික් පෝෂණ කමිටුව පිහිටුවීම පසුගියදා සිදු කෙ‍රිණි.
පෝෂණ කමිටු පිහිටුවීමේ ප්‍රධාන අරමුණ වන්නේ අඩු වර්ධනය හා අඩු බර ව්‍යාප්තිය 40% කින් අඩු කිරීම, ආහාර අපතේ යාම 5% කට වඩා අඩු කිරීම, අවුරුදු 5ට අඩු ළමයි අතරේ අධිබර ව්‍යාප්තිය පාලනය කිරීමයි. මීට අමතරව අඩුබර දරු උපත් පාලනය, ලේ අඩුකමේ ව්‍යාප්තිය වර්තමාන මට්ටමට වඩා 50% කින් අඩු කිරීම යන ඉලක්ක සපුරාගැනීමද මෙම පෝෂණ කමිටුව පිහිටුවිමේ අරමුණයි.
මෙම ඉලක්ක සපුරා ගැනීම සදහා මහනුවර දිස්ත්‍රික්කයේ වැඩසටහන් රැසක් සංවිධානය කර ඇත. පාසැල්වලට පෝෂණයෙන් අනුන උදෑසන කෑමවේලක් හදුන්වා දීම, පෙර පාසැල් දරුවන්ට කිරී විදුරුවක් හදුන්වාදීම, පෝෂණය සම්බන්ධයෙන් පෙර පාසැල් ගුරුවරුන් හා රාජ්‍ය නිලධාරීන් ඇතුළු ප්‍රජාව දැනුවත් කිරීම යන වැඩසටහන් මේ අතර වේ.
එමෙන්ම ගර්භනී මව්වරුන්ට පෝෂණ මල්ලක් හා කිරීවීදුරුවක් ලබාදීම, වෙළදපලේ ඇති ආහාර වර්ගවල පෝෂණීය තත්ත්වය මැන බැලීම වැනි වැඩ සටහන් රැසක් ද ක්‍රියාත්මක කිරීමට සැලසුම් කොට ඇති බවත් දිස්ත්‍රික් ලේකම්වරයා
පැවසීය.
AP/DMU-Kandy
