රවී කරුණානායක මහතා වාචික පිළිතුරු අපේක්ෂාවෙන් ඇසූ ප්‍රශ්නයකට දිනේෂ් ගුණවර්ධන මහතා සභාගත කළ පිළිතුරට අනුව අද වන විට දිවයිනේ සමෘද්ධි ප්‍රතිලාභීහු 1,483,272ක් සිටිති.
2011 දෙසැම්බර් වනවිට සමෘද්ධි ප්‍රතිලාභීන් 1,540,019 දෙනෙක් ද 2012 දෙසැම්බර් වනවිට සමෘද්ධි ප්‍රතිලාභීන් 1,516,543 දෙනෙක් ද සිටියහ.
දිළිඳු ජනතාව ඔවුන්ගේ එදිනෙදා ජීවිතයේ දී මුහුණ දෙන දුෂ්කර අවස්ථාවන් හිදී ඔවුන්ට පිළිසරණක් වෙමින් හා ඔවුන්ගේ පවුල් ඒකක මුහුණ දෙන ආර්ථික කඩා වැටීම්වල දී ඔවුන්ට පිළිසරණක් වෙමින් ආර්ථික සංවර්ධනය සඳහා ඔවුන්ගේ දායකත්වය නොකඩවා ලබාදිය හැකි තත්ත්වයෙන් ඔවුන්ගේ ජීවන තත්ත්වයන් පවත්වා ගැනීමට සුවිශේෂී දායකත්වයක් සමෘද්ධි ව්‍යාපාරය මඟින් ලබා දී ඇත.
සමෘද්ධි සහනාධාර වැඩසටහන තවදුරටත් පුළුල් කරමින් ප්‍රතිලාභීන් ඉතිරිකිරීමට හා ඒ තුළින් ඉදිරි ආයෝජනයට පෙළඹවීමේ අරමුණින් සමෘද්ධි මුද්දරය වෙනුවට ඔවුන්ට හිමි මුදල් සමෘද්ධි බැංකුවල ප්‍රතිලාභීන්ගේ ගිණුම්වලට බැර කිරීමේ ක්‍රමයක් 2012 අප්‍රේල් මස සිට හඳුන්වා දී ඇතැයි ද එම පිළිතුරෙහි සඳහන් වේ.
HC/SDF
