ශ්‍රී ලාංකීය ජනතාවගේ උරුමයක් වු පාරම්පරික දේශීය වෛද්‍ය ක්‍රමය නංවාලීම තුළින් නීරෝගීමත් ජනතාවගෙන් සපිරි දේශයක් ගොඩනැගීම උදෙසා දේශීය වෛද්‍ය රාජ්‍ය අමාත්‍ය නීතිඥ සිසිර ජයකොඩි මහතාගේ උපදෙස් හා මගපෙන්වීම මත දේශීය වෛද්‍ය රාජ්‍ය අමාත්‍යාංශය හා ආයුර්වේද දෙපාර්තමේන්තුව එක්ව මෙය දීප ව්‍යාප්ත පුළුල් වැඩපිළිවෙලක් ක්‍රියාත්මක කර ඇත.
මෙම වැඩසටහන තුළදී පාරම්පරික වෛද්‍යවරුන් මුහුණ පා සිටින ප්‍රශ්න, ගැටළු නිරාකරණය, ආයුර්වේද වෛද්‍ය සභාවේ ලියාපදිංචි ක්‍රමවේද හඳුන්වා දීම සහ ඔවුන්ගේ ජීවන තත්වය නංවාලීම සඳහා අමාත්‍යාංශයේ දායකත්වය ලබා දීම, දේශීය වෛද්‍ය ක්‍රම සංරක්ෂණය, ආයුර්වේද වෛද්‍ය සභාවේ ලියාපදිංචි ක්‍රමවේද හඳුන්වා දීමද මූලික වශයෙන් සිදු කෙරිණ.
එමෙන්ම අමාත්‍යාංශය මගින් ක්‍රියාත්මක සුව - ධරණී - සුව චර්යා වැඩසටහන, සුව ධරණී හෙළ ඔසු සංරක්ෂණ සහ සංවර්ධන වැඩසටහන, සුව ධරණී හෙළ ඔසු පැන් ව්‍යාපෘතිය සඳහා සංරක්ෂණ සභා දායක කර ගැනීමද සිදුකෙරිණ. එමෙන්ම එහිදී දේශිය වෛද්‍ය ක්‍රමයේ උන්නතිය වෙනුවෙන් සිදු කරනු ලබන සේවය අගයමින් සම්මාන ප්‍රධානය කිරීමක් ද, සිදු විය.
එම අවස්ථාවට දේශීය වෛද්‍ය අමාත්‍යාංශයේ අතිරේක ලේකම් (සංවර්ධන) චන්දන තිලකරත්න, හෝමාගම ප්‍රාදේශීය ලේකම් බී.ඒ.ඩි චින්තක, දේශීය වෛද්‍ය අමාත්‍යාංශයේ සහකර අධ්‍යක්ෂ චමල් තේනුවර යන මහත්වරුන් ඇතුළු රාජ්‍ය නිළධාරීන් , පාරම්පරික වෛද්‍යවරුන් විශාල පිරිසක් සහභාගී වී සිටියහ.
