අමාත්‍යවරියගේ ප්‍රධානත්වයෙන් පසුගියදා පැවති සාකච්ඡාවේදී දෙස් විදෙස් සංචාරකයින්ට පහසුවන පරිදි වනෝද්‍යාන, පාරිසරික උද්‍යාන හා සංචාරකබංගලා අනෙකුත් ස්ථාන සඳහා මාර්ගගත ක්‍රමය ඔස්සේ ප්‍රවේශපත් මිලදී ගැනීම හා අනෙකුත් ගෙවීම් සිදුකිරීම සම්බන්ධයෙන් පහසුකම් සැළසීම , ඒ සඳහාඒකාබද්ධ වැඩපිළිවෙලක් සකස් කිරීම, සංචාරක ක්ෂේත්‍රයට අදාළ ආයතන ඒකාබද්ධ කිරීම යන කාරණා පිළිබඳව අවධානය යොමු කර තිබේ.
එහිදී මාර්ගගත ක්‍රමය ඔස්සේ දෙස් විදෙස් සංචාරකයන්ට කල්වේලා ඇතිව සංචාරක බංගලා වෙන්කරවා ගැනීම, ජාතික වනෝද්‍යාන, පාරිසරික උද්‍යාන සහසත්වෝද්‍යාන සඳහා වන ප්‍රවේශපත් මිලදී ගැනීම වැනි දේ තමන් සිටින ස්ථානයේ සිටම පහසුවෙන් සිදුකර ගැනීම සඳහා ක්‍රමවේදයක් සකස් කිරීමසම්බන්ධයෙන් සාකච්ඡා වූ අතර එක් තැනකින් සියලු සංචාරක අවශ්‍යතා සපුරා ගැනීමට ඇති හැකියාව සම්බන්ධයෙන්ද සාකච්ඡා කෙරිණි.
සියලු ක්ෂේත්‍රවල පහසුකම් සලසා දී වැඩි විදෙස් සංචාරකයින් ප්‍රමාණයක් වාර්ෂිකව ගෙන්වා ගැනීම මෙම සාකච්ඡාවේ තවත් අරමුණකි.
මෙම අවස්ථාවට අමාත්‍යාංශයේ ලේකම් චන්ද්‍රා හේරත් මහත්මිය, වනජීවි දෙපාර්තමේන්තුවේ අධ්‍යක්ෂ ජනරාල් , වන සංරක්ෂණ දෙපාර්තමේන්තුවේ අධ්‍යක්ෂජනරාල් ඇතුලු නිලධාරීන් පිරිසක් එක්විය.
