මේ හේතුව නිසා මෙරට ශ්‍රවණාබාධිත පුද්ගලයින් මුහුණ දෙන ගැටළු වලට පිලියම් ලෙස සංඥා භාෂා පරිවර්තකයන් 50 දෙනෙකු වහාම බඳවා ගෙන ඒ සඳහා පුහුණුවක් ලබා දෙන ලෙස අමාත්‍ය එස්.බී.දිසානායක මහතා සමාජ සේවා දෙපාර්තමේන්තු ප්‍රධානීන් හට නියෝග කර ඇත.
සමෘද්ධිලාභී පවුල් වල සිටින උසස් පෙළ සමත් දරුවන් 50 දෙනෙක් මේ සඳහා බඳවා ගත යුතු බවත්, ඔවුන් හට ජාතික සමාජ සංවර්ධන ආයතනය යටතේ වසරක පුහුණුවක් ලබා දිය යුතු බවත්, පුහුණුව අවසන් කළ පසු මෙම පිරිසට සමාජ සේවා දෙපාර්තමේන්තුව යටතේ සංඥා භාෂා පරිවර්තක තනතුර හොඳ වැටුප් තලයක පිහිටුවා ලබා දිය යුතු බවත් අමාත්‍යවරයා මෙහිදි අවධාරණය කර තිබේ.
මෙරට වෙසෙන බිහිරි පුද්ගලයින් ඔවුන්ගේ විවිධ අවශ්‍යතා ඉටු කර ගැනීම සඳහා රාජ්‍ය හා පුද්ගලික ආයතන වෙත පැමිණිමේදී සංඥා භාෂා පරිවර්ථකයන් නොමැති වීමෙන් දැඩි අපහසුතාවයට පත් වන බව මෙම රැස්වීමේදී සමාජ සේවා නිලධාරීන් අමාත්‍යවරයාට පෙන්වා දී ඇති අතර පොලීසි හා අධිකරණ කටයුතු වලදී මෙන්ම රාජ්‍ය හා පුද්ගලික ආයතන වලදී බිහිරි පුද්ගලයින් බරපතල අසාධාරණයකට ලක් වන බව ද මෙහිදී සඳහන් වී ඇත.
එමෙන්ම ශ්‍රවණාබාධිත පුද්ගලයින් හට සංඥා භාෂාව පුහුණු කිරීම සඳහා පවතින සීමිත පාසල් සංඛ්‍යාවේද නිසි පුහුණුව ලත් සංඥා භාෂා පරිවර්ථකයන් නොමැති බව බත්තරමුල්ල සෙත්සිරිපාය පිහිටි සමාජ සවිබලගැන්වීම් හා සුබසාධන අමාත්‍යාංශයේ පැවති මෙම රැස්වීමේදී අනාවරණය වී ඇත.
බඳවා ගන්නා මෙම පිරිසට පුහුණුව අතරතුර ගමන් වියදම් දීමනාවක් ලබා දීමට යෝජනා වී ඇති අතර වසරක පුහුණුව අවසානයේ මෙම පිරිස සමාජ සේවා දෙපාර්තමේන්තුව යටතේ පළාත් මට්ටමින් දිස්ත්‍රික් ලේකම් කාර්යාල වලට අනුයුක්ත කිරීමට නියමිතය.
AP
