සංවර්ධන ව්‍යාපෘති සඳහා ගල් පර්වත කැඩීමට ඉල්ලීම් විශාල ප‍්‍රමාණයක් දෛනික ව දෙපාර්තමේන්තුව වෙත ඉදිරිපත් වේ. මෙහිදී පුරාවිද්‍යා බලපෑම් ඇගයීම් නීතිය යටතේ සංවර්ධකයා විසින් සංවර්ධන සමීක්‍ෂණයක් සිදු කරවා ගත යුතුය. එම තත්ත්වයට මුහුණ දීම සඳහා ලංකාවේ සියලු ම ගල් පර්වත කඩිනම් ගවේෂණ ව්‍යාපෘතියක් යටතේ පරීක්ෂා කොට පුරාවිද්‍යාත්මක වටිනාකමක් ඇති ගල් පර්වත හඳුනාගැනීමේ අරමුණින් මෙම ව්‍යාපෘතිය ක‍්‍රියාත්මක කිරීමට පුරාවිද්‍යා දෙපාර්තමේන්තුව තීරණය කර තිබේ.
මෙහිදී හඳුනාගනු ලබන පුරාවිද්‍යා වැදගත් කමක් නැති ගල් පර්වත පුරාවිද්‍යා දෙපාර්තමේන්තුවේ විමසීමකින් තොර ව අදාළ කාර්යයන් සඳහා සංවර්ධනයන්ට නිදහස් කිරීමට හැකිවන පරිදි ප‍්‍රාදේශීය ලේකම් කාර්යාල , පරිසර අධිකාරිය සහ භූවිද්‍යා හා පතල් කාර්යාංශය ඇතුළු අනිකුත් අදාළ ආයතන දැනුවත් කිරීමට ද පුරාවිද්‍යා දෙපාර්තමේන්තුව තීරණය කර තිබේ.
2015 වසරේ ආරම්භයේ සිට ක‍්‍රියාවට නැගෙන මෙම ව්‍යාපෘතිය සාර්ථක කර ගැනීම සඳහා දෙපාර්තමේන්තුව මහජන සහය අපේක්‍ෂා කරයි.
මෙම ව්‍යාපෘතිය මුවාවෙන් වංචනික පිරිස් පුරාවිද්‍යාත්මක වැදගත්කමක් සහිත ගල් පර්වත අයුතු භාවිතයට යොදාගැනීමට ඉඩකඩ ඇති බැවින්, එසේ පැමිණෙන දෙපාර්තමේන්තු නිලධාරීන්ගේ අනන්‍යතාව තහවුරු කරගන්නා ලෙස පුරාවිද්‍යා අධ්‍යක්ෂ ජනරාල් ආචාර්ය සෙනරත් දිසානායක මහතා ජනතාවගෙන් ඉල්ලා සිටී.
මේ පිළිබඳව යම් වැඩිදුර පැහැදිලි කරගැනීමක් අවශ්‍ය වන්නේ නම් 0112 696 514 දූරකතන අංකය අමතන ලෙස ද අධ්‍යක්ෂ ජනරාල්වරයා වැඩිදුරටත් ඉල්ලා සිටී.
DB
