එ.ජා.පයේ දේශපාලඥයන්ට වඩා රටේ ජනතාව බුද්ධිමත්. යුද්ධය අවසන් කළ ජනාධිපතිතුමා රටේ අස්සක් මුල්ලක් නෑර සංවර්ධනය කරමින් සිටිනවා. රටේ ආර්ථිකය උසස් මට්ටමකට පත්වෙලා. ජනතාවගේ අතමිට සරුවෙලා. දරු මුනුපුරන්ට හෙටක් ඇති රටක් නිර්මාණය කරලා තිබියදී එ.ජා.පයට බලය ලබා දෙන්නේ කුමන වරප‍්‍රසාදයක් ලබා ගැනීමටදැයි ජනතාව ප‍්‍රශ්න කරන බවද ප‍්‍රධාන අමාත්‍යවරයා කීය.

රනිල් වික‍්‍රමසිංහ මහතාත් ජනාධිපතිතුමාත් අහසට පොළොව වගේ වෙනස්. ජනාධිපතිතුමා යන යන තැන ජනතාව රොක් වෙලා පිළිගන්නවා. රනිල් වික‍්‍රමසිංහ මහතා වටා සිටින එ.ජා.ප. මන්ත‍්‍රීවරුන්, පළාත් සභා මන්ත‍්‍රීවරුන් පමණක් නොව ප‍්‍රාදේශීය සභා මන්ත‍්‍රීවරුන් ද ඔහු අතහැර යමින් ජනාධිපතිතුමා සමඟ එක්වී රට ගොඩනගන්න කටයුතු කරනවා. එවැනි යුගයක එ.ජා.ප.ය ඌව ජයගැනීම දවල් දකින හීනයක් සේ ම ඉදිරි ජනාධිපතිවරණයේදී මහින්ද රාජපක්‍ෂ ජනාධිපතිතුමා සමඟ තරග කිරීමට එ.ජා.ප.යෙන් අපේක්‍ෂකයෙකු ඉදිරිපත් කිරීම ද මේ වන විට සිහිනයක් වී ඇතැයි ද ඔහු කීය.