මහනුවර නගරය තුළ අප ජලය බැහැර කිරීම සදහා දැනට විධිමත් ක්‍රමයක් නොමැත. නිවැසියන් විසින් පුද්ගලිකව සකස් කර ගත් අපජලය බැහැර කිරීමේ ක්‍රම යොදා ගෙන තිබුනත් ඒවා බොහොමයක් අවිධිමත් තත්ත්වයේ පවතී. මේ නිසා නගරය තුළ පවතින අවිධිමත් අප ජලය බැහැර කිරීමේ ක්‍රියාවලිය හේතුවෙන් මහනුවර වැව සහ මැද ඇල විශාල ලෙස අපවිත්‍ර වී තිබේ. අවසානයේදී ඒ සියළු අප ජලය මහනුවර සහ මාතලේ දිස්ත්‍රික්කයන්හි ජීවත්වන ජනතාවට පානීය ජලය සැපයෙන ප්‍රධාන ජල මූලාශ්‍රය වන මහවැලි ගඟට මුසු වේ. මහනුවර නගරය කේන්ද්‍ර කර ගනිමින් අපජල කළමනාකරණ ව්‍යාපෘතියක් ඉදි කෙරෙන්නේ මේ සදහා තිරසර විසදුමක් ලෙසය.
ඒ අනුව මහනුවර නගරාශ්‍රිත ප්‍රදේශවල පිහිටි නිවාස වලින් බැහැර කරන අප ජලය නල මාර්ග වලින් ගෙන ගොස් ගන්නෝරුවේ ඉදි කරනු ලබන පවිත්‍රාගාරයකට පරිවහනය කොට පිරිසිදු කර නැවත මුදා හැරීමක් සිදු කෙරේ. මේ නිසා මහනුවර වැව, මැද ඇල සහ මහවැලි ගඟ ඇතුළු ජල මූලාශ්‍රවල ජල දූෂණය වැලැක්විය හැකි අතර, ජනගහනය අධික ප්‍රදේශවල සනීපාරක්ෂක සහ සෞඛ්‍ය කටයුතු වැඩි දියුණු කිරීමටද හැකියාව ලැබෙනු ඇත.
මෙම ව්‍යාපෘතිය මගින් මහනුවර නගරයේ හෙක්ටයාර් 733 ක ප්‍රදේශයක් ආවරණය කරන අතර, නගරයේ අධි ජන ඝනත්වයක් ඇති මහයියාව, දෙයියන්නේවෙල සහ ආටුපට්ටිය යන ප්‍රදේශ වල සනීපාරක්ෂක පහසුකම් වැඩ දියුණු කෙරේ. ව්‍යාපෘතියෙන් මහනුවර නගරයේ නිවැසියන් 55,000 කටත් දිනපතා මහනුවරට පැමි‍ණෙන 150,000 ක සංක්‍රමික ජනතාවටත් ප්‍රතිලාභ ලැබෙන අතර, ව්‍යාපාර හා ගොඩනැගිලි 12,600 ක් ආවරණය කෙරෙයි.
ව්‍යාපෘතියේ සම්පූර්ණ ඉදි කිරීම් කටයුතු 2020 දී අවසන් කිරීමට නියමිත අතර, ඉන් අනතුරුව පවිත්‍රාගාරය සහ ප්‍රධාන පොම්පාගාරයේ මෙහෙයුම් හා නඩත්තු කටයුතු ජාතික ජල සම්පාදන හා ජලාපවහන මණ්ඩලයටත්, මහනුවර මහ නගර සභාවටත් පැවරීමට නියමිතය.
MAP/TA_dmu_kandy
