ශ්‍රී ලංකාවේ නේවාසික වීසා සඳහා අයදුම්කරන පුද්ගලයන්, ලේ දන් දෙන අය හා සායනවලට එන මව්වරුන් මේ පරීක්ෂාවට ලක් කරනු ඇත. මේ වන විට සමාජයේ හඳුනාගත් ඒඩ්ස් රෝගීන්ගේ සංඛ්‍යාව 2009කි. ඉන් 359ක් මියගොස් ඇත. මේ වන විට ඒඩ්ස් රෝගීන් 772ක් රජයේ රෝහල්වලින් ප්‍රතිකාර ලබා ගන්නා බව ද ඔහු කීය.
අමාත්‍යවරයා මෙසේ පැවසුවේ අද (31) පාර්ලිමේන්තුවේදී, පාර්ලිමේන්තු මන්ත්‍රී පී. හැරිසන් මහතා විසින් වාචික පිළිතුරු අපේක්ෂාවෙන් අසන ලද ප්‍රශ්නයකට පිළිතුරු දෙමිනි.
දිස්ත්‍රික් 09ක රජයේ රෝහල්වලින් ප්‍රතිකාර ලබන මේ රෝගීන්ගෙන් එක් අයෙකුට රුපියල් ලක්ෂ 04කට වැඩි මුදලක් වැය කෙරේ. ඒඩ්ස් රෝගය වැළඳීම නිසා වෙනත් රටවලින් පිටුවහල් කළ රෝගීන් 43ක් යාපනයේ සිටින බවට පී. හැරිසන් මහතා කළ ප්‍රකාශයේදී අමාත්‍යවරයා කීවේ එවැනි තොරතුරු මෙතෙක් වාර්තා වී නොමැති බවත් මේ පිළිබඳ සොයා බැලීමට කටයුතු කරන බවත්ය.
රටේ සිටින අය හෝ රටට එන අය බලහත්කාරයෙන් පරීක්ෂා කළ නොහැකි බවත් එසේ කළහොත් එය තමන්ට සිදු වූ අවමානයක් ලෙස සලකා රජයට එරෙහි ව නඩු පැවරීමට ද ඉඩ ඇති බවත් ඔහු පෙන්වා දුන්නේය. ඒඩ්ස් රෝගය පිළිබඳ ව තොරතුරු සැඟවිය යුතු නැති අතර මෙහි අන්තරායක් ඇති බවට සමාජය දැනුවත් කිරීමෙන් රෝගය පැතිරීම වළක්වා ගත හැකි බව ද ඔහු කීවේය.
මෙයට ලෝකයේ කොහේවත් ප්‍රතිකාරයක් සොයා ගෙන නැහැ. ඇතැම් ආයුර්වේද හා හෝමියෝපති වෛද්‍යවරුන් ඒඩ්ස් රෝගය තමන්ට සුවකළ හැකි බවට කරන ව්‍යාජ ප්‍රචාරණ නිසා ආසාදිතයන් රෝහල්වලින් ප්‍රතිකාර ලැබීමට ඉදිරිපත් නො වේ. මෙවැනි ප්‍රචාර නතර කිරීමට නීතිමය විධිවිධානත් නැහැ. ප්‍රතිකාර ලබන අයගේ අනන්‍යතාව ආරක්ෂා කිරීමට ද මෙහි වැඩපිළිවෙළක් තිබේ. මේ වන විට කොළඹ දිස්ත්‍රික්කයේ ඒඩ්ස් රෝගීන් 451ක්, ගම්පහ රෝගීන් 63ක්, මහනුවර 32ක්, කළුතර 13ක්, ගාල්ල 32ක්, කුරුණෑගල 14ක්, අනුරාධපුර 08ක්, පොලොන්නරුවෙන් 07ක් හා යාපනයෙන් 06ක් ලෙස රජයේ රෝහල්වලින් ප්‍රතිකාර ලබන බව ද අමාත්‍යවරයා සඳහන් කළේය.
ඒඩ්ස් ආසාදිතයන් පෞද්ගලික අංශයේ රෝහල්වලින් ප්‍රතිකාර ලබාගැනීමට පැමිණි විට ඔවුන් රජයේ රෝහල්වල ප්‍රතිකාර මධ්‍යස්ථානවලට ම යොමු කරන බව ද රෝගය පිළිබඳ ව ජනතාව දැනුවත් කිරීම විවිධ ක්‍රියාමාර්ග ගෙන ඇති බවද අමාත්‍යවරයා වැඩිදුරටත් පැවසීය.
NDH/HC
