බෞද්ධාගමික වෙහෙර විහාරස්ථානවලට හා ඒවායේ පරිපාලනයට කිසිදු ලෙසකින් රජය මැදිහත්වීමක් සිදු නොකරන බවත් ශ්‍රී ලංකාවේ බෞද්ධ ජනතාව අභිමානවත් ජනතාවක් බවත් මේ තාක් කාලයක් ඔවුන් තම ආගමික ස්ථාන ආරක්ෂා කරමින් කටයුතු කර ඇති බවත් ආණ්ඩුපක්ෂයේ ප්‍රධාන සංවිධායක, ජල සම්පාදන හා ජලාපවාහන අමාත්‍ය දිනේෂ් ගුණවර්ධන මහතා අද (10) පාර්ලිමේන්තුවේදී ප්‍රකාශ කළේය.
පන්සල් පරිපාලනය ඒ ඒ නිකායවල මහානායක හිමිවරුන් විසින් කරගෙන කටයුත්තක් බව පෙන්වා දුන් අමාත්‍යවරයා රජය එම කටයුතුවලට මැදිහත් නොවන බව ද එම මහානායක හිමිවරුන්ගේ එකඟතාව මත පන්සල්වලට විහාරාධිපති ස්වාමීන් වහන්සේලා පත් කරන බවද පෙන්වා දුන්නේය.
කළුතර දිස්ත්‍රික් එජාප මන්ත්‍රී අජිත් පී. පෙරේරා මහතා විසින් පන්සල් වැසීයාම හා පන්සල්වලට ස්වාමීන් වහන්සේලා පත්කිරීමට රජය මැදිහත් වන්නේදැයි වාචික පිළිතුරු අපේක්ෂාවෙන් යොමුකරන ලද පැනයකට අසන ලද අතුරු ප්‍රශ්නවලට පිළිතුරු දෙමින් ගුණවර්ධන මහතා මේ බව පැවසීය.
NDH/HC
රජයේ නිල පුවත් වෙබ් අඩවිය පවත්වාගෙන යනු ලබන්නේ රජයේ ප්‍රවෘත්ති දෙපාර්තමේන්තුවේ නව මාධ්‍ය ඒකකය මගිනි. 1996 වර්ෂයේ මැද භාගයේ දී news.lk නමින් ආරම්භ කළ එය අන්තර්ජාලයට මුදාහරින ලද්දේ 1997 මාර්තු මස 01 දින දීය. එතැන් පටන් සිංහල, දෙමළ හා ඉංග්‍රීසි භාෂාවලින් පවත්වාගෙන යනු ලබයි.
+94 11 366 3040
