ජාතික ආර්ථික සභාව  ඊයේ (10) පස්වරුවේ ජනාධිපති කාර්යාලයේදී ජනාධිපති ගරු මෛතී‍්‍රපාල සිරිසේන මැතිතුමාගේ ප‍්‍රධානත්වයෙන් රැස් වූ අවස්ථාවේදී මේ පිළිබඳ දීර්ඝ වශයෙන් සාකච්ඡාවට ලක්විය.

ශ‍්‍රී ලංකාවේ විදේශ සංචිත ප‍්‍රමාණය වර්ධනය කර ගැනීම සඳහා අපනයන ප‍්‍රවර්ධනය කිරීම සහ ආනයන කළමනාකරණය කිරීම සම්බන්ධයෙන් බදු ප‍්‍රතිපත්තියේ සිදුකළ යුතු සංශෝධන පිළිබඳව ද මෙහිදී අවධානයට යොමු විය.

එමෙන්ම අපනයන ප‍්‍රවර්ධනය සඳහා වැඩි සහන ලබාදීමටත්, දිරිගන්වන බදු ප‍්‍රතිපත්තියක් කි‍්‍රයාත්මක කිරීම පිළිබඳවත් සාකච්ඡාවට ලක් කෙරිණි.

ශ‍්‍රී ලංකා ආර්ථිකයේ වර්ධනය උදෙසා විදේශ විනිමය සැලකිය යුතු දායකත්වයක් ලබාදෙයි. විදේශ රටවල සිට ලංකාවට මුදල් එවීමේදී බදු හෝ ගාස්තු වශයෙන් කිසිදු අයකිරීමකින් තොරව එම මුදල් සම්පේ‍්‍රෂණය කිරීමට අවස්ථාව සැලසීමට ද මෙහිදී උපදෙස් දුන් ජනාධිපතිතුමා එමගින් ලංකාවේ විදේශ විනිමය වර්ධනය කරගත හැකි බව පෙන්වා දුන්නේය.

මෙරටට ගෙන්වනු ලබන ඉන්ධන කොළඹ වරායේ සිට කොළොන්නාව දක්වා ප‍්‍රවාහනය කිරීමට ඉදිකෙරෙන විශ්කම්භය 12,ක් වූ නව නළ මාර්ගයේ ඉදිකිරීම් කඩිනමින් සිදුකිරීමට උපදෙස් දුන් ජනාධිපතිතුමා එම නළ එළිමේ කටයුතුවලදී මහවත්ත ප‍්‍රදේශයේ මතුව ඇති ගැටලුකාරි තත්ත්වය නිරාකරණය කරගැනීම සඳහා ගතහැකි පියවර පිළිබඳව ද සාකච්ඡා කළේය.

විදුලිබල හා බලශක්ති අමාත්‍යාංශය විසින් ජපාන රජයේ ආධාර යටතේ සැලසුම් කර තිබෙන 2030 දක්වා වූ බලශක්ති සැලැස්ම ශ‍්‍රී ලංකාවේ ජපාන තානාපති Kenichi Suganuma මහතා විසින් මෙහිදී ජනාධිපතිතුමා වෙත පිළිගැන්වීය. ජයිකා ආයතනයේ විශේෂ නියෝජිත Fusato Tanaka මහතා ද මෙම අවස්ථාවට එක්ව සිටියේය.

ජාතික ආර්ථික සභාව සඳහා අමාත්‍යවරුන් වන මංගල සමරවීර, මහින්ද සමරසිංහ, අර්ජුන රණතුංග, රංජිත් සියඹලාපිටිය, කබීර් හෂීම්, රාජ්‍ය අමාත්‍ය අජිත් පී. පෙරේරා යන මහත්වරුන් ඇතුළු මැති ඇමතිවරු පිරිසක් ද, ජනාධිපති ලේකම් උදය ආර්. සෙනෙවිරත්න, ජාතික ආර්ථික සභාවේ මහලේකම් මහාචාර්ය ලලිත් සමරකෝන් යන මහත්වරුන් ඇතුළු නිලධාරින් එක්ව සිටියහ.