වර්තමානයේ අපේ නිලධාරීන් විසින් මේ බන්ධනාගාරයට ඇතුළු වන රැඳවියන්ගේ ආරක්ෂාව, රැකවරණය, පුනරුත්ථාපනය පමණක් නො ව ඔවුන් මේ සමාජයේ යහපත් පුරවැසියන් බවට පත්කරන්න, නිර්මාණශීලී මිනිසුන් හැටියට සමාජගත කරන්න, මහා පරිශ්‍රමයක යෙදී සිටිනවා. ඒ වගේම බන්ධනාගාර දෙපාර්තමේන්තුව අද මේ රටේ ආර්ථික ක්‍රියාවලිය ශක්තිමත් කරන බලාගාරයක් විදියට තමන්ගෙ කැපවීම ඉටුකරමින් රැඳවියන්ගේ නිපුණතා දියුණුකරමින් රටට ආදර්ශයක් දෙමින් කටයුතු කරනවා. මේ ගමන මෙසේ ශක්තිමත් කරන්න පුළුවන්කම ලැබුණේ මේවාගේ පරිත්‍යාගයන් ඔස්සේ රාජ්‍ය සේවයට ආදර්ශය සපයමින් කැපකළ මේ පිංවන්ත පරිත්‍යාග නිසයි.

බන්ධනාගාර දෙපාර්තමේන්තුව කියලා කියන්නෙ මහා යෝධයෙක්. ඉතාම දක්ෂකම්වලින් පිරුණු විවිධ හැකියාවලින් සමන්විත දක්ෂ නිලධාරීන්ගෙන් පරිපූර්ණ වූ දෙපාර්තමේන්තුවක්. ඇත්ත වශයෙන්ම මේ දෙපාර්තමේන්තුව තුළ තිබෙන තත්ත්වය, හැකියාව බොහෝ වේලාවට සමාජයට යන්නේ නැහැ. තම ජීවිත පරිත්‍යාග කළ මේ නිලධාරීන් ඔවුන්ගේ බලාපොරොත්තු, ඔවුන්ගේ අභිප්‍රායන් මේ දෙපාර්තමේන්තුව විනයගරුක, කැපවීමෙන් ක්‍රියාකරන ඕනම අභියෝගයක් මරණය හමුවේත් භාරගන්න සූදානම් කියන පණිවිඩය ලබා දෙනවා. අපේ පුනරුත්ථාපන ක්‍රියාවලිය ජාත්‍යන්තර වශයෙන් කීර්තියට පත්වෙච්ච ක්‍රියාවලියක්. ඒ ගෞරවය මේ නිලධාරීන්ට හිමිවෙලා තිබෙනවා. යම් විවේචන මේ දෙපාර්තමේන්තුවට තිබුණත් පසුගිය කාලපරිච්ඡේදය තුළ මෙහි ගෙන ගිය නව නිර්මාණශීලී වැඩ කොටස අපේ රටේ සමහරු අගය නොකළත් ජාත්‍යන්තර වශයෙන් ඇගයීමකට ලක්වෙලා තිබෙන බව ද අමාත්‍යවරයා වැඩිදුරටත් සඳහන් කළේය.