ඩවොස් නුවර ලෝක ආර්ථික සමුළු මධ්‍යස්ථානයේ දී ශ්‍රී ලංකා අග්‍රමාත්‍ය රනිල් වික්‍රමසිංහ මහතා ඇතුළු දූත පිරිස හමුවූ අවස්ථාවේ ස්වැප් මහතා වැඩිදුරටත් ප්‍රකාශ කළේ, මේ සමුළුව තව තවත් ශක්තිමත් කරලීම උදෙසා තම සංවිධානය නවමු අදහස් ගණනාවක් ඉදිරිපත් කිරීමට එකඟ බවය.
පසුගිය වසරේ සිට ලෝක ආර්ථික සමුළුවත්, එහි විධායක සභාපති ස්වැප් මහතා ප්‍රමුඛ නිලධාරී මණ්ඩලයත් ශ්‍රී ලංකාව වෙත දක්වන සහය අතිශය අගය කරන බව වික්‍රමසිංහ මහතා පැවසීය.
වත්මන් ශ්‍රී ලංකාව විධිමත් හා නිවැරදි ආර්ථික මාවතකට ප්‍රවේශ වී ඇති බැවින්, ලෝක ආර්ථික සමුළුවේ සහය සහ උපදෙස් හැමවිටම ශ්‍රී ලංකාව වෙත ලබා දෙන බව සභාපතිවරයා අවධාරණය කළේය.
ලෝකයේ නව ආර්ථික ප්‍රවණතා සහ අභියෝගයන් පිළිබඳව මෙහිදී අවධානය යොමු කෙරිණි. ඒ ප්‍රවණතාවන් හා සැසඳෙමින්, අභියෝගයන් හමුවේ ශක්තිමත්ව නැගී සිටීමේ අවකාශයන් සම්බන්ධව ද මෙහිදී අදහස් හුවමාරු කර ගැනිණි.
මුදල් අමාත්‍ය රවි කරුණානායක, විදුලි සංදේශ සහ ඩිජිටල් යටිතල පහසුකම් අමාත්‍ය හරීන් ප්‍රනාන්දු, ජිනීවා හි ශ්‍රී ලංකා තානාපති රවිනාථ ආරියසිංහ සහ අග්‍රාමාත්‍ය අතිරේක ලේකම් සමන් අතාවුදහෙට්ටි යන මහත්වරුන් ද මේ සාකච්ඡාවට සහභාගී වූහ.
