මෙම චූඩාමාණික්‍යය ප්‍රදර්ශනය ඊයේ දිනයේදී (18) ආරම්භ වූ අතර පැය 24 පුරාවට ම බැතිමතුන් හට මෙය වන්දනාමාන කර ගැනීම සඳහා අවස්ථාව විශ්ව පාරමී පදනම විසින් සළසා දී ඇත.

නොවැම්බර් මස 21 වන දින උදෑසන මෙම චූඩාමාණික්‍යය රථ පෙරහරකින් අනුරාධපුරය වෙත රැගෙන යන අතර 21 සහ 22 දිනයන්හිදී කුරුණෑගල ඇත්කඳ විහාරයේදී බැතිමතුන් හට මෙය වන්දනා කිරීමට අවස්ථාව සැලසේ.

මෙම මස 23,24,25 දිනයන්හිදී රුවන්වැලි මහ සෑ සලපතල මළුවෙහි නිර්මාණය කරන ලද විශේෂ කුටියක් තුළ මෙම චූඩාමාණික්‍යය තැන්පත් කර එහිදී ද මෙය වන්දනාමාන කර ගැනීමට ජනතාව හට අවස්ථාව උදා වේ.

25 වන දින සවස නව චූඩාමාණික්‍යය කොත් වහන්සේට පැළඳවීම සිදු කරන අතර පසුදා (26) උදෑසන කොත් වහන්සේ නිරාවරණය කිරීමට නියමිතය.

කිලෝග්රෑම් 60 කින් යුත් චූඩාමාණික්‍යයෙහි මැණික් ගල් 4900 ක් පමණ ඔබ්බවා ඇති අතර අඩි දෙකක් පමණ උසැති මෙම චූඩාමාණික්‍යයෙහි පළිඟු මැණික ඔස්ට්‍රියාවෙන් මෙරටට ගෙන්වන ලදී.

කිසි දිනෙක දැක බලා වන්දනාමාන කර ගත නොහැකි මෙම උත්තරීතර චූඩාමාණික්‍යය වැඳපුදා ගැනීමට පැමිණෙන ලෙස සියලුම බැතිමතුන්ගෙන් විශ්ව පාරමී පදනම ඉල්ලා සිටියි.