යල කන්නයේ නෙලාගත් අස්වැන්න ශ්‍රී දළදා සමිදුන්ට පූජා කිරීමේ අරමුණින් පැවැත්වෙන මෙම අස්වනු පූජාව පැවැත්වෙන්නේ සිව්වැනි වරටයි.
ඒ අනුව ඔක්තෝබර් 03 වැනි දින පෙ.ව. 4.30 ට ශ්‍රී දන්ත ධාතූන් වහන්සේ උදෙසා සිදු කෙරෙන කිරි ආහාර පූජාවෙන් සහ සිව් මහා දේවාල සදහා පැවැත්වෙන මුරුතැන් පූජාවත් සමග යල් අස්වනු පූජාවේ වැඩසටහන ආරම්භ කෙරෙනු ඇත. අනතුරුව පෙ.ව. 8.00 සහල් පිරවූ පාත්‍ර සහ අනෙකුත් ධාන්‍ය සහ අටපිරිකර රැගත් බැතිමතුන් පෙරහැරෙන් පැමිණ පෙ.ව. 10.00 ට ශ්‍රී දන්ත ධාතූන් වහන්සේ වෙත බුද්ධ පූජාව පැවැත්වීමට කටයුතු සංවිධානය කොට තිබේ.

මල්වතු සහ අස්ගිරි මහනායක ස්වාමීන් වහන්සේලාගේ ආශිර්වාද මධ්‍යයේ සිදු කෙරෙන පූජාවෙන් අනතුරුව 60 නමක් ස්වාමීන් වහන්සේලා උදෙසා සංඝගත දක්ෂිණාවක් සහ අටපිරිකර පූජාවක් පැවැත්වීමටද නියමිතය.

ශ්‍රී දළදා සමිදුන් උදෙසා සිදු කෙරෙන පූජෝපහාර වලින් අනතුරුව මහනුවර මීරා මක්කම් පල්ලිය, පුල්ලෙයාර් කෝවිල සහ ශාන්ත අන්තෝනි දෙව් මැදුර යන ආගමික මධ්‍යස්ථාන මුල් කරගෙනද අලුත් සහල් සහ ධාන්‍ය පූජා කිරීමේ වතාවත් සිදු කිරීමට සැලසුම් කොට තිබේ.
කෘෂිකර්ම, ග්‍රාමීය ආර්ථක කටයුතු, වාරිමාර්ග සහ ධීවර හා ජලජ සම්පත් සංවර්ධන අමාත්‍යංශය මගින් සංවිධානය කරන මෙම අවස්ථාව සදහා එම අමාත්‍යංශය භාර අමාත්‍ය පී හැරිසන් මහතා ඇතුළු මැති ඇමතිවරු රැසක් සහභාගී වීමට නියමිතය.
අලුත් සහල් මංගල්‍යය පවත්වන දිනට පෙර එනම් ඔක්තෝබර් 02 දින සවස 4.00 ට මහනුවර වැල් බෝධි පරිශ්‍රය කේන්ද්‍ර කරගෙන විශේෂ බෝධි පූජාවක් සහ ගිලන්පස පූජාවක් පැවැත්වීමටද කටයුතු යොදා තිබේ.

DMU/Kandy