රේගු පනත සහ ආනයන අපනයන පනත ඉක්මවමින් 2013 වසරේදී පනවන ලද රෙගුලාසියක් උපයෝගී කර ගනිමින් 2017-2018 වසරවලදී එංගලන්තයෙන් ශ්‍රී ලංකාවට කසළ අඩංගු බහාලුම් 241 ක් ගෙන්වා තිබෙන බවත් මේවා වහාම ආපසු එම රටටම යවන ලෙස මධ්‍යම පරිසර අධිකාරිය ඒවා ගෙන්වූ සමාගමට නියෝග කළ බවත් රජයේ ප්‍රවෘත්ති දෙපාර්තමේන්තුවේ අද(05) පැවැති ප්‍රවෘත්ති සාකච්ඡාවකදී ඒ මහතා කීය.

මෙරටේ වන ගහණය ක්‍රමයෙන් අඩුවීම බරපතල ප්‍රශ්නයක් බවත් 1948 දී රටේ මුළු භූමි ප්‍රමාණයෙන් 45% ක් ව තිබූ වනාන්තර ප්‍රමාණය මේ වන විට 29% දක්වා අඩුවී ඇති අතර එම ප්‍රමාණය 32% දක්වා වැඩිකිරීම රජයේ උත්සාහය බවත් මෙහිදී පැවැසූ රාජ්‍ය අමාත්‍යවරයා ඒ සදහා අලුතින් ගස් 178000 ක් වගාකිරීමට දැන් කටයුතු කරගෙන යන බවත් පැවැසීය.

අලුතින් වන වගාව සදහා රජයේ ඉඩම් හෙක්ටයාර් 95 ලක්ෂයක් හදුනාගෙන තිබෙන අතර ඒවායේ ගස් සිටුවා වනාන්තර බවට පත්කිරීම සදහා රජය දේශීය හා විදේශීය ආයෝජකයින්ට ආරාධනා කරන බවද සදහන් කළ මාන්නප්පෙරුම මහතා එහෙත් ඒ වනාන්තර වල අයිතිය රජය සතුවන බව කීය.

ප්ලාස්ටික් වැනි නොදීරන ද්‍රව්‍ය භාවිතය අවම කිරීම සදහා මහජනතාව සහ පාසල් සිසුන් දැනුවත් කිරීමේ වැඩපිළිවෙලක් පරිසර අධිකාරිය විසින් ක්‍රියාත්මක කොට ඇත.

ප්ලාස්ටික් ද්‍රව්‍ය මහජනතාවගෙන් මිලදී ගැනීමේ මධ්‍යස්ථාන 32 ක් ගම්පහ දිස්ත්‍රික්කයේ ආරම්භ කිරීමට කටයුතු යොදා තිබේ.දැනට පානිය ජල බෝතල්වල මූඩිය මතුපිට තිබෙන ප්ලාස්ටික් වැස්ම නොමැතිව ජල බෝතල් නිපදවන ලෙස ජල බෝතල් නිෂ්පාදකයින් ගෙන් ඉල්ලා සිටීමට කටයුතු කරගෙන යන බව ද රාජ්‍ය අමාත්‍යවරයා තවදුරටත් පැවසීය.